El Comité d’Espertos de la Carta Europea de les Llingües visitará Asturies na seronda

Sixto Molina, secretariu xeneral de la Carta Europea de les Llingües Minoritaries o Rexonales, confirmó a Fernando Padilla que los espertos que faen siguimientu al cumplimientu de la mesma van desplazase a Asturies o Galicia n’ochobre o payares. El direutor xeneral acudió a València a la II Fira dels Idiomes.

Continuidá de la Fira de les Llengües celebrada nel 2016, tamién nel Centre del Carme de la capital valenciana, la Generalitat tornó a axuntar la selmana pasada na mesma a los responsables de política llingüística de tolos territorios que sofiten el Protocolu de Collaboración en Materia de Política Llingüística, esto ye, Galicia, Euskadi y Catalunya, primeros firmantes del mesmu, y Illes Balears, Comunitat Valenciana y Nafarroa. Como hai dos años, Asturies y Aragón, les dos úniques con idioma nun oficial, participaron como convidaes.

La reunión tuvo enfocada precisamente al posicionamientu de les llingües cooficiales a nivel estatal, como l’estudiu de les mesmes en cualquier territoriu al traviés de les escueles oficiales d’idioma o la so presencia nos medios de comunicación públicos, ente otros munchos aspeutos. Los responsables de política llingüística tamién tuvieron la oportunidá de falar sobre’l quintu Informe sobre'l cumplimentu de la Carta Europea de les Llingües n'España, correspondiente al añu 2014-2016, con Molina.

Na reunión, el secretariu xeneral confirmó a Padilla que representantes del Comité d’Espertos van facer la so visita pa recoyer información sobre’l cumplimientu en Galicia y Asturies de la mesma n’ochobre y payares. Previsiblemente, anque entovía ta por confirmar, los alcuentros van celebrase nesta ocasión nel nuesu país.

“La visita foi positiva porque te permite conocer la realidá de los que se ta faciendo n’otros territorios pola normalización llingüística”, destacó’l direutor xeneral de Planificación Llingüística y Normalización na so vuelta a Asturies.

Asamblea xeneral del NPLD

La Fira dels Idiomes, que se celebró del miércoles al vienres baxo la coordinación Direcció General de Política Lingüística i Gestió del Multilingüisme, tamién tuvo un espaciu de puestinos sobre’l valencianu y el catalán con presencia d’universidaes y coleutivos, y acoyó l’asamblea xeneral del Network to Promote Linguistic Diversity (NPLD), rede europea onde participen los gobiernos de los territorios estatales con llingua cooficial y representantes corsos, bretones, galeses o frisios, ente otros.

Na semeya, Padilla xunto con Marta Fuxá (responsable de Política Llingüística d'Illes Balears); Mikel Arregui (Nafarroa); Esther Francesca (Catalunya); Vicent Marzà, conseyeru d’Educación de la Generalitat Valenciana; Rubén Trenzano (Comunitat Valenciana;) Miren Dobarán, viceconseyera de Política Llingüística del Eusko Jaurlaritza; Valentín García, secretariu xeral del Gobiernu de Galicia; y José Ignacio Susín (Aragón).