Los llectores d'Asturies.com ven nel PP una estratexa nidia pa valtar too avance na normalización del idioma

Un 97 por cientu de los usuarios d'Asturies.com que participaron nel nuesu 'Conceyu Abiertu' cree que'l PP tien una estratexa nidia contra too avance na normalización de la llingua asturiana. Namái'l 3 por cientu considera que los ataques son casos puntuales.

La entruga formulada nesti 'Conceyu Abiertu' yera '¿Tien en marcha'l PP una campaña pa valtar cualquier avance na normalización del asturianu?', a lo que la práutica mayoría de los nuesos llectores respondió que 'sí, los casos que se tán dando correspuenden a una estratexa política de los populares asturianos' qu'empezaría cola postura amosada pola presidenta de los populares, Mercedes Fernández, col ataque al emplegu del idioma na Xunta Xeneral. Por contra, el 3 por cientu optó por 'Non, son aiciones puntuales dientro de la llinia política del partíu'.

Dende esti momentu yá ye posible votar nun 'Conceyu Abiertu' nuevu. Nesta ocasión queremos conocer la opinión de los nuesos usuarios sobre la creación de la marca paragües 'Alimentos del Paraíso Natural' pa promocionar los productos asturianos. Ésta nun fai referencia nenguna a Asturies, como si lo faen otres marques d'ésitu, como la popular 'Galicia Calidade', sinón que sigue la llinia de Castilla y Lleón con 'Tierra de Sabor'.