'Alimentos del Paraíso Natural', marca paragües de los productos asturianos

|
Samuel Trabanco, Isabel García Tejerina y María Jesús Álvarez

Asturies ta presente con stand propiu nel Salón de Gourmets, feria que se celebra en Madrid. El Gobiernu anunció que va empezar a trabayar cola marca 'Alimentos del Paraíso Natural' qu'identificará a los productos del país pa facilitar la so promoción y esportación.

Según les pallabres de María Jesús Álvarez, conseyera de Desenvolvimientu Rural y Recursos Naturales, la marca 'Alimentos del Paraíso Natural' va amparar les pequeñes y grandes producciones d'Asturies baxo esti eslogan común coles mires de “encarar los mercaos nacionales y internacionales de forma compartida, defendiendo inclusive les cestes de productos que combinen bien y que tienen un mercáu esterior qu'hai que conquistar”.

“Esti salón ye'l meyor escaparate pa les producciones asturianes, porque identifica los productos que tienen valor pola so naturalidá, porque son tradicionales y singulares. Ésti ye'l casu de les producciones d'Asturies, munches d'elles con sellos de calidá como la Indicación Xeográfica Protexida o la Denominación d'Orixe Protexida, y toes elles amparables na marca 'Alimentos del Paraíso Natural'”, añadió Álvarez.

La conseyera esplicó que’l so departamentu pretende impulsar esta marca de calidá “de forma inmediata”, yá que la promoción esterior resulta complicada pa munches pequeñes promociones d'Asturies y precisen un eslogan que les identifique. “El Principáu ye un territoriu con valores bien importantes, que tán tamién nes nueses producciones primaries y nos nuesos alimentos, lo que constituye un valor añedíu”, continuó.

Salón de Gourmets

Dende ayeri y hasta'l xueves, ta celebrándose n'IFEMA Madrid el XXX Salón de Gourmets, feria internacional d'alimentación y bébores de calidá qu'axunta a más de 1.400 espositores y atrai a 84.000 visitantes profesionales. Asturies participa nél con un stand nel que presenta los meyores productos del país, como la sidra, la carne, el mariscu o los quesos, y qu'ayeri visitó la ministra d'Agricultura, Alimentación y Medio Ambiente, Isabel García Tejerina.

Na semeya, García Tejerina y Álvarez comenten sobre productos de Sidra Trabanco en compañía del xerente del llagar, Samuel Trabanco, nel stand asturianu.

Contador Estadistiques