"Esti ciclu quier ser una muestra de l'actividá investigadora sobre la llingüística y filoloxía asturiana", afirma Ramón D'Andrés

Xulio Viejo abre'l ciclu de conferencies 'Los estudios filolóxicos asturianos, güei' con una charra sobre los 'Procesos históricos nel espaciu llingüísticu asturiano-lleonés'. Va ser a les 19.30 hores nel Real Instituto de Estudios Asturianos (RIDEA) con entrada llibre.

Ramón d'Andrés ye'l responsable d'esta iniciativa na que collabora'l Seminariu de Filoloxía Asturiana de la Universidá d'Uviéu, del que tamién ye coordinador. "Naz d'una propuesta interna que fixi al RIDEA, del que formo parte, institución qu'entama tolos años conferencies de muncho altor sobre historia, arte o arqueoloxía tolos años, iniciatives que son desconocíes por muncha xente", señala'l profesor universitariu, que consideraba que "el terrén filolóxicu taba bastanta desantendíu" dientro d'estos ciclos.

'Los estudios filolóxicos asturianos, güei' pretende, poro, cubrir esti güecu, dando a conocer al traviés de cuatro conferencies el trabayu nesti campu. "Esti ciclu quier ser una muestra de l'actividá investigadora sobre la llingüística y filoloxía asturiana", apunta d'Andrés, qu'afirma que "el llabor investigador nesti campu ye muncho más amplio de lo que recueye esti ciclu y destaca por tar al altor de los tiempos, con metodoloxíes novedoses".

A les 19.30 hores

Les charres van celebrase los cuatro xueves próximos na sede del RIDEA, asitiada nel Palaciu Conde Toreno (Plaza Porlie 9-Primeru, Uviéu), siempre con comienzu a les 19.30 hores y entrada llibre hasta completar aforu. "La conformanza histórica del asturiano-lleonés, algamando una determinada estensión xeográfica y afitando un conxuntu peculiar de trazos llingüísticos, ye un procesu directamente relacionáu col vertebramientu territorial y políticu d’un reinu" supón l'avance de la primera, protagonizada por Viejo.

Les trés restantes van tratar otres temátiques, como la frontera del asturianu pel occidente, a cargu del propiu d'Andrés (3 de marzu); los inicios de la lliteratura asturiana, por Xuan C. Busto (día 10); o la obra del Padre Galo, protagonizada por Antón García (día 17).