“El tema los muertos ye lo que más vivo ta na tradición”, afirma Álvarez Peña

‘El Día Difuntos na tradición asturiana’ centró la temática de la primer de les charres qu’entama la Lliga Celta d’Asturies. L’etnógrafu Alberto Álvarez Peña faló de lo que se facía “hasta antayeri” n’Asturies na viéspora del 1 de payares.

Fernán Morán, presidente de la Lliga Celta d’Asturies, encargóse de presentar l’actu y d’esplicar al públicu cómo “l’aculturización xabaz que vive la nación asturiana en tolos aspeutos” llevó a un piñu de persones a echar a andar esta organización. “Queremos esparder la cultura asturiana”, añadió, pa depués confirmar que la cita celebrada’l miércoles nel salón d’actos de la xixonesa Biblioteca Pública Xovellanos va continuar con otres conferencies y visites organizaes, a lo qu’hai que sumar l’actividá na rede que lleven faciendo dende hai un tiempu.

Pa la charra inaugural, la Lliga Celta d’Asturies quixo contar con ún de los meyores espertos en cultura asturiana, Álvarez Peña, de la Fundación Belenos, que centró la so intervención en ‘El Día Difuntos na tradición asturiana’ con motivu de la cercanía a esta fecha que se celebra güei y que n’Asturies ta anguaño contaminada pol Halloween estauxunidense, tradición con raigaños europeos que viaxó a América y que torna agora influenciada pol cine y la televisión. En primer llugar contestualizó esta fecha, que na tradición cristiana celebrábase’l 13 de mayu, hasta que nel sieglu VIII, por decisión del papa Gregorio III, pasóse a payares cola intención de facer propia la fiesta pagana que nesa xornada festexaba’l cambiu d’estación, cuando la escuridá ganaba a la lluz. Darréu, Álvarez Peña fixo un incisu pa refugar l’usu de la pallabra Samhain o Samaín pa referise a esta fecha, como se vien faciendo nos años últimos n’Asturies y, con más fuercia, en Galicia, esplicando que “nuna llingua céltica asturiana’l términu asemeyaríase más al ‘Samonios’ galu qu’a ‘Samhain’”.

Nesa xornada, la xente buscaba “congraciase colos seres que vivíen na escuridá, los muertos”, y centróse na figura del bon muertu, al que se-y facía ufriendes cola intención de consiguir la so proteición pal añu viniente; la de la casa y la de los sos medios de subsistencia, el ganáu y la tierra. Asina, n’Asturies, y n’otros llugares, celebrábase’l banquete funerariu, consistente n’organizar una cena –inclusive na propia tumba del muertu– y dexar un poco pal difuntu. La ilesia tamién lluchó contra esta práutica, mui común hasta hai bien poco, na que les castañes yera un productu habitual. Les families con mayor poder adquisitivu llegaben a matar un carneru o un xatu. “Yeren autentiques fartures”, esplicó l’etnógrafu.

Los aguilandos

Estes manifestaciones “pa brindar la vida” empiecen nel Díi de Difuntos, pero allárganse hasta l’Antroxu con otres manifestaciones, como los aguilandos el díi de Navidá, n’Añu Nuevu y en Reis. “Trátase de congráciate pa volver a renacer”, apunta Álvarez Peña, que citó una bona riestra d’exemplos concretos na conferencia. Tamién esplicó cómo lo que se fai anguaño en Halloween ye dalgo paecío a los aguilandos, sustituyendo los dulces de la época polos caramelos.

Inclusive, nel Díi de Difuntos, ricos y probes pidíen poles cases, dalgo que l’Obispu de Mondoñedo yá intentó prohibir nel 1541. Esto se suplantaría polos mayordomos d’ánimes, que pidíen en nome de la Ilesia comida o dineru pa los difuntos. La reconocencia por parte de la Ilesia de la esistencia del purgatoriu tamién ayuda al catolicismu na xestión d’estes tradiciones paganes y l’alquisición de fondos, coles mises por difuntos. Asina, Álvarez Peña citó la esistencia de munches capielles d’ánimes fechaes sobre’l 1600 y el 1700, dalgunes tovía en pie, en Cabranes, Piloña, Villaviciosa o Colunga.

Sobre’l vacíu de les calabaces, que tanto se ve agora por influencia de Halloween, l’etnógrafu recordó que nun ye nada nuevo na tradición asturiana, anque “primero se facía con nabos”. Nelles introducíase una vela y colocábense nos cruces de caminos, nel güertu o la ventana col ánimu d’asustar al vecín. “Ye dalgo mui d’equí”, afirmó Álvarez Peña.

Darréu, l’especialista faló de Jack El Linterna –rellacionao coles calabaces– y el Don Juan Tenorio, reivindicada como constumbre propia española pa esta fecha –dalgo que refugó–, y citó les apaiciones que tienen llugar nesta Nueche d’Ánimes según la tradición asturiana: la güestia, la bruxa y el carru la muerte. De caún d’elles contó delles anécdotes y histories que prestaron enforma al públicu presente.

“El tema los muertos ye lo que más vivo ta na tradición”, afirmó Álvarez Peña, que centró la parte final de la so intervención nel mal muertu, “el que quedó en facer dalgo en vida y nun lo fixo, o fixo mal en vida”. Ésti provoca ruidos, golpes o fai enfermar al ganáu o albortar a les vaques, polo qu’había que lu aplacar, y citó l’exemplu d’Amparo, la bruxa de Brañavara, como persona qu’hasta bien poco dedicábase a ello.

Na semeya, Álvarez Peña y Morán.