Pangua: “N’Asturies hai déficit de música de gaita fecha a la manera tradicional”

Pedro Vicente Pangua Rivas (Uviéu, 1962) y Diego Pangua Cuesta (Uviéu, 1983) son los responsables de ‘En Ca’l Gaiteiru’, una ayalga que recueye musica tradicional col enfontu d’ampliar el repertoriu de la gaita asturiana y mostrar la so diversidá interpretativa y organolóxica. Padre y fíu atendieron a Asturies.com dende La Puela, onde reside'l segundu.

‘En Ca’l Gaiteiru’ ye muncho más que un llibru-CD que recopila música tradicional.

Diego: Esti trabayu quier, nun sentíu ampliu, reivindicar el purismu nel mundu de la música tradicional asturiana. Fai falta más purismu; n’Asturies hai déficit de música de gaita fecha a la manera tradicional. Pensamos que ye necesario esplicalo, porque nestes últimes décades yá ye un tópicu que los gaiteros mozos se reivindiquen siempre como ‘renovadores’ y manifiesten querer cambiar la música del país, ‘digan lo que digan los puristes’, cuando en realidá la xente suel tocar mui poca música tradicional y ye eso lo primero de lo que se tendríen que preocupar.

Pedro: Por eso, ‘En Ca’l Gaiteiru’ quier animar a los gaiteros a conocer meyor la diversidá de gaites, repertorios y técniques interpretatives de les distintes zones del país. Esto va poder llevalos a aumentar el so repertoriu incluyendo más pieces de los munchos gaiteros tradicionales qu’hebo y qu’hai n’Asturies. Y siempre conociendo la historia de cada pieza, y cómo queda reflexada nella la manera de tocar y de sentir la música de cada gaiteru. Porque la música tradicional foi tresmitida por persones, persones que tienen muncho que contar; nun se trata de deprender a mover los deos de tal o cual manera pa repetir melodíes, sinón d’entendeles como parte d’un fenómenu cultural mui ricu.

¿Trátase tamién d’un repás a la vuesa esperiencia musical acumulada mientres años?

P: Sí, tamién ye eso. Pa mi ye una bona manera de celebrar 35 años nel ‘mundillo’, y por eso ente les más d’ochenta partitures incluyíes nel llibru atópense delles trescripciones de pieces que tengo tocao nos grupos de los que formé parte, como Xaréu o la banda gaites Fonte Fuécara. Tamién hai partitures de pieces que tracen la carrera musical de Diego hasta’l momentu presente.

¿Qué va atopar el llector/escuchante ‘En Ca’l Gaiteiru’?

D: Un CD de 21 pistes nes que tocamos pieces tradicionales inédites na mayor parte. Lo que tien d’especial ye que respetamos les técniques interpretatives de les distintes partes d’Asturies, d’Ibias a la frontera con Cantabria y más p’allá, y qu’emplegamos gaites y tambores antiguos que representen l’antigua diversidá organolóxica del universu gaiteru astur. Ye una diversidá que güei ta casi esmucida, lo que-y da interés a esti retu.

El CD va acompañáu d’un llibru nel que van incluyíos testos, fotos y partitures que profundicen na idea central del CD.

¿Qué fontes utilizaron pa la so ellaboración?

D: Los nuestros archivos personales, frutu de tantos años de dar clases de gaita y del contactu con gaiteros de la tradición, y tamién materiales sacaos d’archivos d’otres persones relacionaes cola música de tradición oral. D’eses otres persones la más importante ye Xosé Ambás, que nos pasó munchísimu material y que pa mi ye’l gran referente no qu’a trabayar con rigor y dedicación se refier. 

Nes grabaciones tuvieron mui en cuenta la manera de tocar y l’usu d’instrumentos antigüos y de la zona d’onde procede la pieza.

P: Buscábemos una coherencia interna lo más perfecta posible, y l’usu d’instrumentos orixinales garantizábanosla. N’Asturies tán construyéndose gaites muy bones, pero estes gaites modernes son na so mayoría instrumentos temperaos, pensaos pa  tocar en bandes o con otros instrumentos, y tan apartaes de la primitiva diversidá tímbrica, porque busquen toes una determinada sonoridá, ‘unificada’ pa tol territoriu.

¿Cuál ye’l principal problema qu’atopa anguaño la gaita asturiana?

D: La perda de la so personalidá. Los gaiteros mozos parez que saben tocar namás les pieces propies de los concursos de gaita, que son ocho o nueve melodíes y tán pensaes pa mover rápido los deos y pa que les escuche un públicu sentáu, perdiendo en munchos casos la so función principal de facer baillar. Too eso metiendo cuantos más cromatismos y ocurrencies meyor, pa impresionar al xuráu… Asina la nuestra tradición vese dirixida por una minoría de gaiteros, qu’amás tienen menos de 25 años y que salen pela tele. Nun me parez un bon modelu.

Otru problema ye’l tema del conservatoriu, y equí mi padre sé que nun ta d’acuerdu (rises de los dos), pero ye que ta utilizándose dinero públicu pa convertir a la gaita nun instrumentu de música clásica, tocando a Bach o a Rachmaninoff… Como curiosidá pue tar bien, pero como camín a llargu plazu a mí parezme bien triste.

¿Qué ye lo que llevó a la perda de la diversidá nel repertoriu de la gaita asturiana?

P: L’éxitu de superestrelles como Libardón y Remis Ovalle fizo que munchos gaiteros cambiaran el repertoriu vieyu de la so zona por versiones de les pieces que tocaben ellos. Tamién ta el tema de la emigración y l’abandonu de los pueblos, claro. Al perdese fiestes, procesiones y ocasiones de tocar ye natural que los repertorios vayan escaeciéndose. Y si se recuperen, munches veces va contratáu un gaiteru digamos ‘modernu’ que toca’l repertoriu estándar, non les pieces vieyes de la zona.

D: D’esti tema sabe muncho Fonsu Fernández, director del Muséu de la Gaita de Xixón. Ayudónos muncho y, por cierto, ta acabante doctorase con una tesis sobro’l repertoriu de la gaita.

¿Qué más aspeutos deberíen cuidase pa que la gaita asturiana nun pierda la so esencia?

D: Pues el yá comentáu del repertoriu y algo mui importante, que ye’l trabayu colos luthiers pa dir sacando más gaites singulares que tengan escalas antigües o, polo menos, naturales envede temperaes. Aparte de recuperar los instrumentos vieyos qu’anden per Asturies y ponelos a furrular, claro, que ye lo que ficimos nesti trabayu. Y pa facelo, pa crear ‘En Ca’l Gaiteiru’ contamos cola ayuda del escelente facedor de gaites Chus Solís, qu’amás de facer gaites modernes-estándar de restallu tien muncha sensibilidá por esti tema y ta poniendo a funcionar auténtiques reliquies.

Nuna entrevista previa nuna emisora de radio, Diego falaba de que con ‘En Ca’l Gaiteiru’ tamién pretenden desplazar hacia l’occidente del país el centru de gravedá de la gaita asturiana.

D: Ye que la zona más rica, con más repertoriu y variedá de gaites, ye l’occidente’l país. Pero yá sabes, l’aislamientu, la distancia, etc., faen qu’esi repertoriu nun tenga tanto prestixu nin se conoza tanto como’l del oriente, por exemplu’l de los mencionaos Libardón y Remis. Hai que dir cambiando’l chip. Esto inclúi tamién reconocer la presencia de la gaita gallega moderna nes practiques musicales del occidente, claro.

¿Cómo ta siendo’l recibimientu de ‘En Ca’l Gaiteiru’ ente los gaiteros y aficionaos a la música?

D: Pues nun te sé decir (rises). Ye un trabayu tan especial que nun puede funcionar como un discu folk al usu, ye un producto más gourmet, y les ventes tán siendo un gotéu suave pero sosteníu y constante, que suponemos va mantenese unos años. Los comentarios tan siendo mui bonos, tamos mui contentos.

¿Ta saliendo fuera de les nueses llendes?

P: Inda non, pero hai proyectos. Siguiremos informando a traviés d’Asturies.com, si nos dexáis (rises).

¿Cómo se valora fuera d’Asturies esti instrumentu y el so repertoriu?

D: La gaita ye un instrumentu presente en munchos países, y la xente lo que quier ye autenticidá, conocer qué ye lo verdaderamente privativo de la gaita asturiana. Por eso, cuando sales fuera siempre ye más interesante dir con gaites de tímbrica tradicional y con tambor de cuerda que con modelos que son yá pseudoescoceses, porque al públicu siempre va interesa-y más l’orixinal que la copia.

¿Tienen pensao dar continuidá a esti llibru-CD?

P: Si grabáremos el discu otra vez mañana, probablemente meteríemos otres pieces y usaríemmos otres gaites que conocimos nestos últimos meses, asina que…, ¡posiblemente!

¿Ónde se pue atopar ‘En Ca’l Gaiteiru’?

Nel enllaz http://encalgaiteiru.blogspot.com.es/2015/07/el-discu.html ta too esplicao.