BQ saca a la venta un modelu con Ubuntu Phone, sistema operativu que trai l'asturianu de fábrica

Fíxose esperar, pero l’Aquaris E4.5 Ubuntu Edition yá ye en una realidá. Esti modelu de la marca madrilana BQ ye’l primeru que lleva Ubuntu Phone, sistema operativu basáu en Linux pa dispositivos móviles que trai de fábrica a la llingua asturiana ente los idiomes pa escoyer.

La empresa Canonical firmara con BQ un alcuerdu pa la integración d’Ubuntu Phone nos sos aparatos y informara a Softastur en xunetu que contaba con esta comunidá de software llibre, que yá tornara al nuesu idioma Ubuntu y Android al traviés de la ROM de CyanogenMod, pa incorporar al asturianu ente los idiomes disponibles del sistema operativu. Nun entamu, esperábase’l primer teléfonu intelixente Ubuntu pa la seronda, pero la salida al mercáu finalmente retrasóse hasta esta fin de selmana pasada.

El BQ Aquaris E4.5 Ubuntu Edition “tien un procesador Cortex-A7 de Mediatek de cuatro núcleos a 1.3 GHz con una gráfica Mali 400, acompañaos de 1 GB de memoria RAM y 8 GB d’almacenamientu internu”, incorporando una batería de 2150 mAh y doble micro-SIM, según detallen dende Softastur. Una de les carauterístiques más importante d’esti móvil ye l’usu de SCOPES, “espacios qu’amiesten conteníu procedente de dellos servicios. Diferénciense de les apps móviles pol so calter integrador. Asina, por exemplu, pa escuchar música, un usuariu pue acceder dende’l mesmu espaciu a canciones de SoundCloud o de Grooveshark”. El dispositivu tamién cuenta coles funcionalidaes normales de corréu-e, navegación web, cámara, galería…, a lo qu’hai que sumar INRIX, “que da a los usuarios d’esti smartphone accesu direutu a la información del tráficu en tiempu real”. De venta namái nos estaos de la Xunión Europea, tien un costu de 169,90 euros.

“Pa crear aplicaciones pa Ubuntu Phone, los desendolcadores disponen de ferramientes basaes en HTML5 pa que puedan crear la so app de mou rápidu y cenciellu enantes de xubila a la tienda d’aplicaciones oficial”, añade esta comunidá d’usuarios.