Ubuntu Phone tamién va ufrir la posibilidá d’usar l’asturianu en dispositivos móviles

|

Depués de que sía posible usar Android en llingua asturiana al traviés de la ROM de CyanogenMod, bien pronto va facese lo propio col sistema Ubuntu Phone. Ésti va tar na cai ente setiembre y ochobre col asturianu ente los idiomes a escoyer.

Según informa Softastur, comunidá de software llibre responsable de la torna d’Ubuntu y d’Android al nuesu idioma, ente otros, la empresa Canonical firmó col fabricante BQ un alcuerdu pa la integración del sistema operativu pa móviles de creación nueva Ubuntu Phone. Estos dispositivos van a salir a la cai ente los meses de setiembre y ochobre, y l’apuesta de Canonical ye que los que se vendan nel Estáu incorporen toles llingües, oficiales o non, ente elles l’asturiana, como se pue ver na imaxe qu’acompaña esta noticia. Meizu ye otru fabricante que podría incorporar Ubuntu Phone.

Otra manera, el serviciu web na nube OwnCloud tamién tará dispoibible n’asturianu nes selmanes próximes gracies al trabayu de Softastur. Esta ferramienta permite xubir, baxar y compartir ficheros con otres persones –al mou de Dropbox– y sincronizar esos ficheros nos equipos que tengamos, cola particularidá de que tamién da la posibilidá de trabayar sobre ficheros de testu online, xestionar contautos, calendariu, tabla de xeres y  organizar semeyes, ente otres munches coses. Según apunta Softastur, OwnCloud va arreyáu a OpenMailBox y con una cuenta nesti corréu-web seguru va ser posible utilizar les dos aplicaciones.

Contador Estadistiques