El Conseyu Asesor de la Llingua de Xixón ábrese a les asociaciones que trabayen pol asturianu

La propuesta presentada por Humberto Gonzali al Conseyu Asesor de la Llingua de Xixón pa que'l muérganu s’abriese a les entidaes que trabayen pol idioma, aceptóse. El representante del PP celebra'l fin d'esta “incoherencia”.

Tuvieron que pasar cinco años pa que se camudaren los estatutos del Conseyu Asesor de la Llingua de Xixón, dalgo que tamién demandó la Xunta pola Defensa de la Llingua Asturiana (XDLA) na reunión celebrada nel mes de setiembre na que se convidaron a delles organizaciones enfotaes na defensa del idioma, como L’Asociación Cultural L’Arribada, l’Asociación Cultural N’Ast, Iniciativa pol Asturianu y la Tertulia Cultural El Garrapiellu –que nun unvió representante nesa sesión–. Hasta esti momentu, namái participaben nestos conceyos l’alcalde/alcaldesa o la persona na que delegue, que preside’l Conseyu; la Oficina Municipal de la Llingua; tolos grupos municipales; la Conseyería d’Educación, Cultura y Deporte; el Conseyu de la Mocedá de Xixón; l’Academia de la Llingua Asturiana; la Federación de Asociaciones de Vecinos de Gijón (FAV); la Federación de Asociaciones de Vecinos Rurales de Gijón ‘Les Caseríes’; Comisiones Obreres; UXT; USO; SUATEA; l’Asociación Empresarial de Hostelería de Gijón, Carreño y Villaviciosa; y dos persones “de reconocíu prestixu y dedicación a los llabores rellacionaos coles funciones del Conseyu”.

D’esta forma, fina esta “incoherencia”, como señala Gonzali, representante del Partíu Popular (PP) nel muérganu, escritor, xestor cultural y presidente del Círculu Lliberal d'Asturies. Col cambiu de los estatutos estes organizaciones pasen a ser miembros de plenu derechu nel Conseyu Asesor de la Llingua de Xixón.