José Ángel Gayol, premiu Xuan María Acebal de poesía con ‘El llibru de les coses misterioses’

El mierense José Ángel Gayol resultó ganador del XVIII Premiu Xuan María Acebal de poesía. El xuráu escoyó, por unanimidá, ‘El llibru de les coses misterioses’ como la meyor de les nueve obres presentaes a concursu esti añu.

Xosé Anxelu Gutiérrez Morán, Pablo Texón y Lourdes Álvarez formaron el xuráu, presidíu pola direutora xeneral de Política Lingüística, Ana María Fueyo, qu’alcordó otorgar el premiu, dotáu con 4.000 euros, a Gayol por un poemariu que, “basándose na memoria y el viaxe, aporta l’ecu personal de les voces ayenes”. L’escritor, nacíu nel 1977 en Mieres del Camín, presentó la so obra ‘El llibru de les coses misterioses’ baxo’l nomatu Tenysson y releva como ganador del premiu al propiu Gutiérrez Morán ('Un cierto desorde').

Tamién críticu lliterariu, Gayol collaboró con revistes como Clarín, Reloj de Arena, Paralelo Sur, Formientu y esTandoriu, asina como dellos medios de comunicación, ente ellos La Nueva España. En llingua asturiana espublizó la novela ‘Argonautes’ (Ámbitu, 2007), la obra de teatru ‘Ensin noticies del fin del mundu’ (Universos, 2011) –ganadora del Premiu Asturies Xoven de Testos Teatrales 2010–, asina como artículos y cuentos en prensa y antoloxíes. Anguaño, tien dos poemarios en víes de publicación: ‘Los poemes del oriental’ (XX Premiu Elvira Castañón, 2011) y ‘Los suaños y los díes’ (XVIII Premiu Fernán Coronas, 2011).