'L’Arte Popular na sociedá tradicional asturiana', temática del XIII Seminariu de la Fundación Belenos

Los díes 17 y 18 de payares, La Puela va acoyer el XIII Seminariu d’Estudios Asturianos de la Fundación Belenos. La temática sobre la que va xirar esta edición ye'l 'Arte Popular na sociedá tradicional asturiana’.

Esta actividá va seguir una estructura similar a la ediciones anteriores, con delles charres y una salida pela zona. Asina, la presentación y inauguración del Seminariu va celebrase’l sábadu 17 a les 10.30 hores, pa continuar cola ponencia ‘Considerances sobre teoría y fenomenoloxía del Arte Popular’ (11 hores), a cargu de Gerardo Díaz Quirós, doctor n’Historia del Arte, y ‘Arte Popular y modernidá: el casu del horru asturianu’ (12.30 hores), d’Ástur Paredes, etnógrafu y miembru de la Fundación Belenos.

Tres la xinta, les charres van siguir a les 17 hores cola participación de Jesús González Calle, profesor d’IES, que va falar del ‘Arte Popular de tradición barroca nos horros y paneres asturianos’. Darréu, a les 18.30 hores, va ser el turnu d’Alberto Álvarez Peña, etnógrafu y miembru de la Fundación Belenos, que va tratar sobre la ‘Ornamentación y simbolismu nos preseos tradicionales asturianos (cuernes, gaxapos, marcos, rueques…)’. Pa zarrar la xornada, tres la cena, va celebrase un filandón con música del país nel Café Centro.

La salida prevista nel seminariu va tener llugar na mañana del domingu. A partir de les 11 hores, los participantes nesta actividá de la Fundación Belenos van facer una visita guiada a dellos llugares de la zona con bonos conxuntos d’horros y paneres. Nuna d’estes paraes, al aire llibre, va entamase un conceyu abiertu col simbolismu y la funcionalidá nel Arte Popular como tema de discutiniu. Tres esta actividá, a les 14.30 hores, va celebrase la xinta y el piesllu oficial del XIII Seminariu d’Estudios Asturianos.

La inscripción pa participar nestes actividaes tien un preciu de 35 euros, cola posibilidá d’incluyir agospiu con pensión completa –dende la xinta del sábadu a la xinta del domingu– na Nueva Allandesa por 60 euros más per persona. La xente interesao ha d’ingresar les perres de la inscripción nel númberu de cuenta de Caxa Rural d’Asturies 3059-0086-09-2348652823 pa formalizar la matrícula, que se considerará fecha namái col pagu total de les perres. Pa más información, pue ponese en contautu cola organización nos teléfonos 985.24.48.11 y 616.242.319, o na direición de corréu electrónicu seminariudebelenos@gmail.com.