Mónica Rodríguez: “El Plan de Normalización nun trai nada nuevu con respectu a la Llei d’Usu, así que nun veo’l problema”

El pasáu mes de febreru aprobóse’l Plan de Normalización L.lingüística de Cangas del Narcea colos votos a favor del equipu de gobiernu, encabezáu pol alcalde José Manuel Martínez,  y del grupu del PP, votando a la contra’l PSOE.
 
Darréu d’ello saltó la polémica por cuenta de la posibilidá que recueye’l documentu de valorar el conocimientu de la nuesa llingua a la hora d’optar a un puesto de trabayu n’alministración local. Asturies.com faló con Mónica Rodríguez Riesgo, responsable del Serviciu de Normalización L.linguística del Conceyu de Cangas.

Mónica Rodríguez Riesgo (L.luarca 1982) ye llicenciada en Filoloxía Hispánica, anguaño ta faciendo'l doctoráu y investigando aspectos de la dialectoloxía y la dialectometría del asturianu occidental y ye amás la responsable del Serviciu de Normalización L.linguística del Conceyu de Cangas del Narcea. 

(Asimesmo, al final d’esta entrevista, Asturies.com ufre a los sos llectores el documentu completu del Plan de Normalización L.lingüística de Cangas del Narcea).

¿Cómo fue'l procesu d'ellaboracion del Plan de Normalizacion? ¿Inspiróse n'algún otru modelu?

El Plan de Normalización pa Cangas del Narcea ta feitu d’una parte con información ya modelos garraos d’outros sitios, principalmente Santiago (Galicia), ya, d’outra, contemplando las particularidades l.lingüísticas del asturianu n’Asturias ya’l marcu concretu ande se vei implantar el plan, que yía’l conceyu de Cangas.

¿Nesi procesu d'ellaboracion implicáronse persones ayenes al Serviciu de Normalización, asociaciones, partíos políticos, etc del propiu conceyu?

El faer el Plan únicamente implicóu al Serviciu de Normalización L.lingüística ya a la Conceyalía de Cultura, outra cousa yía que se tuvieran en cuenta aspectos de distintos ámbitos ou qu’una vez feitu fuera sometíu a consensu políticu ou qu’espuéis de la polémica muitos partíos ya asociaciones lu refugaran, yía’l casu de CCOO, UXT, PSOE,  ou nos dieran el sou apoyu a tódolos niveles , por exemplu, Bloque por Asturies, la coalición del Conceyu L.lena, PAS, IX; Xunta pola Defensa de la Llingua Asturiana ou Xuristes pol Asturianu.

A la fin el Plan aprobóse colos votos afirmativos del equipu de gobiernu y del grupu municipal popular, votando a la contra’l grupu socialista ¿Fue una sorpresa’l resultáu de la votación?

Non, pa nada, supongo que todos somos yá conocedores de los posicionamientos políticos que los distintos partíos tienen en relación al tema l’asturianu.

Darréu d’ello españó una polémica que llegó a tolos medios de comunicación asturianos y al senu propiu gobiernu del Principáu, enforma por cuenta de la valoración del asturianu a la hora de les convocatories pa empléu municipal ¿Contábase con esta polémica? ¿Sorprendiéron-y les crítiques en particular de dalgún partíu, sindicatu o persona?

La verdá que nun cuntaba pa nada con esta polémica absurda, el Plan nun trai nada nuevu con respectu a la Llei d’Usu del Asturianu del 98, así que nun veo’l problema, aparte que yía bien claru ya respetuosu con todo lo que tien que ver cola diversidá l.lingüística, en Cangas van tar representadas las dúas l.linguas: asturianu ya castellano, así que nun veo’l problema, precisamente de lo que se trata yía de refugar prexuicios ya situaciones l.lingüísticas discriminatorias, cumo las que vive a día de güei l’asturianu.

De todas maneras, gustaríame esclariar la situación, lo que vei faese en Cangas yía valorar el conocimientu d’asturianu cumo formación complementaria na midida na que sea oportunu sigún el puestu a desenvolver,  nun vei tratase cumo un requisitu ya muito menos penalizase la non acreditación, nun sei porque se manipulóu así la información…, trátase, simplemente, de valorar na midida que se considere pa cada casu, nin muito nin pouco, tal ya cumo se puede valorar cualquier outru cursu de formación complementaria sea d’inglés, d’ofimática ou de corte ya confección, nun veo que yía lo polémico nin lo discriminatorio, la verdá…

¿Dende'l Serviciu de Normalización L.lingüística piénsase modificar el Plan por cuenta d’esta polémica?

El Plan nun vei cambiase, ente outras cousas porque ta respaldáu polos artículos 23 ya 103 de la Constitución; polos 4 ya 8 de la Llei d’usu ya pol puntu 10.4 de la Carta Europea de les Llingües Minoritaries ya pol Real Decretu 1111/1979.

L'aplicación d'esti Plan a dos años vista, ¿Qué avances va suponer pal asturianu nel conceyu de Cangas?

Esperamos lo máximo que se puede esperar d’un plan de normalización, que dignifique ya equipare, lo fundamental pa nós yía la integración de la diversidá l.lingüística nun marcu de convivencia ya normalidá total, ande nenguna de las variantes l.lingüística que coexisten en Cangas sea subsidiaria n’usu a la outra.