Bloque-UNA-LV-GV mira al futuru pese al mal resultáu eleutoral
|
30 Marzu, 2012 por Pablo R. Guardado
- Inicie sesión o rexístrese pa espublizar comentarios
La coalición Bloque-UNA-LV-GV asoleyó esti vienres un comunicáu nel que valora los sos sos resultaos nes eleiciones del 25-M. La formación fai autocrítica y afirma que va siguir trabayando pa consolidar el so proyeutu xunitariu.
La coordinadora de la coalición apunta que los resultaos de les eleiciones, onde sumó 1.639 votos (un 0,32 por cientu del total) “solo pue calificase de malu” y abre un periodu de reflexón dientro de Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV). “Les causes que nos llevaron a esti númberu de votos, tan per debaxo de les mires, entendemos que son tanto esternes como internes, y especialmente nel segundu casu, han de llevanos a una autocrítica fonda que modifique formes d'actuación, d'organización, de comunicación y d'estratexa”.
Asina, los responsables de los trés partíos consideren que “nun escenariu difícil, impuestu en parte poles circunstancies, nun supimos atopar un güecu, un discursu y una práutica qu'ilusionara a les más de 6.000 persones que nos votaren en mayu –en parte pola lentitú nel procesu d'afitamientu y visibililización d'una alternativa común nos meses últimos– nin consiguimos llegar a sectores nuevos a los que dirixíamos el nuesu
discursu, y a pesar del esfuerzu realizáu na nuesa campaña, el nuesu mensaxe nun llegó a más que 1.600 persones, yá que nun fuimos a tresmitir que la nuesa coalición podía ser una alternativa válida a los dos grandes bloques que se formaren”. D’igual forma, apunten como otra causa’l fechu de que la población interpretara esta cita como una segunda vuelta de les eleiciones de mayu “na que les opciones amenorgábense principalmente a dos: desallugar a Foro al traviés d'un gobiernu de PSOE ya IX o torgar que volviera'l PSOE al gobiernu asegurando un gobiernu de FAC. Nesi escenariu, l'espaciu d'actuación y de tresmisión del nuesu mensaxe y propuestes convertióse en mínimu y el llamáu votu útil xugó na nuesa contra d'una manera evidente”.
“Agora ye'l momentu de mirar p'alantre, facer autocrítica, reflexón, deprender de los erros, valorar positivamente y afitar los aciertos, y trabayar con rixu y responsabilidá pensando nel futuru. Sicasí, nun podemos escaecenos de dar les gracies a una militancia bien activa qu'a pesar de les dificultaes y la escasez de medios, trabayó con ilusión y ensin descansu na campaña, nin podemos dexar de señalar que'l trabayu conxuntu ente
organizaciones con xénesis y práutiques polítiques distintes cada día ye más fácil”, continúa’l comunicáu. La coordinadora de la coalición sigue pensando en qu’esti “proyeutu políticu asturianu autónomu, pensáu y articuláu dende la izquierda, l’asturianismu, l’ecoloxismu y enraizáu nos movimientos sociales, ye necesariu nel nuesu país, polo qu’entiende que “agora ye'l momentu de que les organizaciones que formen esta coalición analicen el contestu políticu, faigan les sos reflexones y les pongan en comuña pa redefinir el proyeutu y siguir, tres esta esperiencia de la que tenemos enforma qu'aprender, col procesu de xunión, ampliación y afitamientu d'un proyeutu conxuntu y ampliu que se quedó atayáu pola convocatoria electoral”.
Por último, dende’l Bloque-UNA-LV-GV afirmen tar “convencíos y convencíes de qu'hai munchos miles de persones a los que nun lleguemos nesta ocasión, pero que pueden volver enfotase en nós, o facelo per primer vegada. Por ello, facemos una llamada a correxir con humildá y realismu los nuesos erros y convidamos a quien crea n’una alternativa d'esti tipu, quien nos votó y quien nun lo fixo, a la xuntura pa llevantar con fuerza y ente toos y toes l'alternativa política y la Asturies que queremos”.
Efrén d'Andrés
Comentarios
Pero ¿por qué echáis balones pa fuera? ¿Nun véis que´l problema ta en... "proyeutu políticu asturianu autónomu, pensáu y articuláu dende la izquierda, l’asturianismu, l’ecoloxismu y enraizáu nos movimientos sociales"...Asina nun paga la pena siguir. Yá son cifres cuasi como les d´Andecha. Nun hai estructura nacionalista a lo llargo del país. Depués yá vendrán los votos. Pero tien d´haber dalgo debaxo, hom. Tenéis que tener una rede de barucos, asociaciones, y una editorial. Nel fondu lo d´AA taba muncho meyor pensao si nun fueren una secta. Valía más furrular en cada conceyu como una simple Asociación, que se dedique a formar a los más mozos, a editar caratafueyos, a axitar la cosa identitaria. Dexáivos d´electoralismos, por favor, que nos queden sieglos pa sacar un diputáu non prestáu por Valledor. Pero ánimu, de toes formes.
El futuru ye el pasau i non ye malu perder nuna democracia, lo pior ye ser ñeciu cuando el camin ta trancau.
El Foru fixomos ver que hai espaciu, pa un partiu dende Asturies p' Asturies, esin ser enfotaos de Madri.
Que el Foru non fixo munchu tamien ta claru, poro non sabemos onde llegaria, si lu hubieren dexau trabayar i non el bloqueu permanente de los enfotaos de Madri.
Solu con el pesu'd Cascos fixo creer a munchos, ensin tener les ideyes de elli nin munchu menos,poro con la esperaza de facer dalgo por Asturies. Solu asina se pode facer una alternativa valida,dando confianza ala xente.
Solu esi camin ta abiertu, poro la xente non lu vio i agora mas de lo mesmu!!Añeciar nel pasau ye fracasu total.
Vamos, que más de lo de siempre, que ye: "el futuru va ser un riscar nacionaliegu enllenu enfotos y músiques de tachín tachín", el trabayu illusionante la militancia enllénanos d'arguyu y porgüeyos, Asturies sigue lluchando, bon argumentu pa una película estilu Ben-Hur, Qvo Vadis o La Túnica Sagrada, d'estes que ponen na Selmana Santa. Por fin tenemos una Asturies llibre y socialista, porque llibremente vuelve confiar nel PSOE como fuerza hexemónica.
Gabis
El mio sofitu a los comentarios d'enbaxo. Nun saben facer política. Por saber nun saben que ye obligao llevar corbata y parecer recién salíu de la ducha. Eso en cuanto a la imaxe. Del conteníu y del mensax ya nin te cuento.
Los que teníen que facer autocrítica son les 6.000 y pico persones que'l día de dir a votar quedaronse en casa o votaron a otres fuerces y agora glayen contra los únicos que polo menos fueron capaces de mover el culu, si una cosa quedó clara nestes elecciones ye la poca disciplina del electorau asturianista que nun ye capaz nin tan siquiera de facer algo tan simple como meter un votu nuna urna, cosa que nun lleva más de 10 mínutos, o que camuda'l votu en función de desastroses estratexes electoralistes y cancios de sirena.
Sí home sí. Los votantes son tontos o vagos ¿verdá?
Mui llistos nun son cuando-y dan la mayoría absoluta'l PP o vuelven a votar al PPoE dempués de lo que fizo, a lo que parez el votante asturianista sigue'l mesmu patrón, nun ye capaz nin de mover el culu pa dir a votar y llueu tien la caradura d'enrabietase cuando por mor de la so vagancia y galvana quedamos en manes del españolismu más xabaz y radical, a los españolistes nun-yos importa que la so lideresa seya una friki narcisista y que provenga del PPoE, fueron toos a votar, en cambiu nel asturianismu namás que se movilicen pa dir al chigre o pa insultar a los que sí se mueven nos foros.
Tas guapu, llamando vagos y bobos a los que nun vos siguieron. Has siguir ñegando la realidá, "Fuelgu", qu´inda con 7000 votos nun dibes nin poder comer pipes. Sóbrenbos los perendengues, yá pesen muncho, folgaos.
Y a ti sobrate caradura, ye mui cómodo insultar a los que sí faen algo, dende casina y amparau nel anonimatu, si nun sois capaces nin de mover el culu nin pa dir a votar, ¿de qué vos quexais?.
Pero ¿dende cuándo esti mediu permite esi llinguaxe cuarteleru y tabernariu? ¿Ye esta la Coalición que presumía d´"ecuanimidá"? ¿Represéntesla tu, "Fuelgu"? Non, si esto ye´l síndrome de l´andechización progresiva del asturianismu. Nun reconocer los fracasos, echar balones fuera, culpar a tou quisqui menos a los de la propia capiellina, "mantenese na mesma llínia ideolóxica" (ye dicir, ser un calcu d´IU) y nun baxase de la burra nunca. Tais arreglaos, guapinos, que sois lo más contraproducente pal nacionalismu asturianu que nunca nun vio. Llamando "caradura" al que vos critica ¿queréis gobernar un país?
Tas fechu tou un demócrata, apelando a la censura dempués de llamar "folgaos" a los únicos que fueron capaces de movese, si nun te presta la llinia ideolóxica de la coalición ehí tienes a FAC, o a UPyD que parez que te va muncho más.
Pa censura, la que tenéis los vuestros en dellos medios "alternativos". Pa censura, la mordaza que vos punxístis pa nun asoleyar un res de la tremenda xostrapada de los 1.6oo votos (y pocu más). Táis dando la consigna de "nun sacar trapos gochos fuera" (¿qué pienses, que nun me llegó la orden a min tamién?) pero la triste realidá ye que yá tenéis tola borrafa fuera, yá más nun podéis sacar. Saber, sábese too. Esos correos que circulen y que ponen "nun entréis nel blogue tal o cual", y too eso. ¿Ye qu´eso nun ye "censura", folgaos? Vaya unos demócrates, que callaís como afogaos. La mayoría de los asturianos nun sabe nin siquiera qu´esistís, pero los que sí vos tienen un poquiñín en cuenta, salen escopetaos. La llínia ideolóxia...cahunmimantu...¿cuála ye? ¿Eso del "ecoloxismu, izquierdismu, movimientos sociales....y asturianismu"? ¿Aú tuvo la identidá asturiana nes tos intervenciones? Dábate inda vergoña´l sacala nes entrevistes. Asina nun pue ser. ¿Pensáis que con negar la realidá vaís a denyure? Mira, Folgáu, que pa "cabezaleru" fáltente fervores.