El Principáu, CC.OO y UXT refuguen que l'asturianu se valore como méritu nes oposiciones de Cangas del Narcea
|
5 Marzu, 2009 por E.P. / Redacción
- Inicie sesión o rexístrese pa espublizar comentarios
Ana Rosa Migoya, aseguró ayeri que la propuesta de Cangas del Narcea de valorar la conocencia de la llingua asturiana nes oposiciones "va a la escontra de la Llei d'Usu del Asturianu". Representantes sindicales de la zona vieron la midida "problemática"mentes que Xuristes pol Asturianu apoyaron la midida.
Migoya, qu'ofreció una rueda prensa pa dar cuenta de los acuerdos adoptaos nel conseyu de Gobiernu, indicó que l'Alministración, cuando llegue l'acuerdu plenariu adoptáu pol Ayuntamientu de Cangas del Narcea, van facer llegar esa alvertencia d'illegalidá dende l'ámbitu de l'Alministración Llocal.
Ye la interpretación que fai Migoya de lo que diz l'artículu cuartu de la citada norma: "El Principáu d'Asturies va propiciar el conocimientu del bable/asturianu por tolos emplegaos públicos que desarrollen el so llabor n'Asturies; el conocimientu del bable/asturianu va poder ser valoráu nes oposiciones y concursos convocaos pol Principáu d'Asturies, cuando les característiques del puestu de trabayu y la naturaleza de les funciones que vayan a desarrollase lo requieran".
La conseyera esplicó que la Llei d'Usu y Promoción establez tener en cuenta la conocencia del asturianu nes convocatoriaes de selección de les alministraciones públiques pa los puestos que tengan rellación precisamente cola promoción o espardimientu de la llingua asturiana pero non pal restu.
"Nun se pue xeneralizar esta midida contemplada na Llei d'Usu y Promoción del asturianu a toles convocatories porque la llei ye mui clara", acabó Migoya.
OPOSICIÓN SINDICAL Y APOYU XURIDICU
En declaraciones a la Televisión Pública Asturiana, recoyíes por Europa Press, dos representantes sindicales del sector públicu de la zona de Cangas del Narcea y del suroccidente asturianu mostraron la so oposición a la midida.
En pallabres del miembru d'UXT, "con esta midida lo único que va algamar ye crear munchos problemes al propiu Ayuntamientu y a aquellos trabayadores que puean optar a una plaza". Pal representante de Comisiones Obreres, "pol fechu de falar una llingua nun se pue aumentar la puntuación nuna oposición determinada".
Tanto Comisiones Obreres como UXT apoyen la oficialidá de la llingua asturiana, una opción que, d'aprobase, conllevaría la exixencia (obligatoria y non como méritu) de conocencia d'asturianu pa dellos puestos de l'Alministración.
Pel so llau l'Aconceyamientu de Xuristes pol Asturianu (AXA) afitó que la midida concasa dafechu cola llegalidá definida na Llei d'Usu.
Efrén d'Andrés
Lo + visto de la selmana
Comentarios
Asina que Migoya diz qu'esta midida "va a la escontra de la Llei d'Usu del Asturianu". Qué curioso, ye lo mesmo que lleva faciendo la FSA durante años, pasase la Llei d'Usu pol forru.
Cada vez que se quiera dar un pasu, por pequeñu que seya, na normalización social del idioma vamos atopanos con casos como esti. Yo pensaba que cola que ta cayendo nel tema llaboral ciertos sindicatos deberíen de preocupase pola situación de trabayadores y paraos. Pero paez que ye prioritario miaga-y al gobiernín pa participar nel repartu de les pitances del réximen.
¿CCOO y UXT son los mesmos que van a les manifestaciones pola OFICIALIDÁ?, Toi ablucau con esta xente, glayen por que l'asturianu sal a la vida social de Cangas y queden silentes depués de que la FSA pieslla los Astilleros de Xixón, esto yá ye de llocos. Otru añu más que nun voi dir a la manifestación del CAO mientres estos dos sindicatos sigan ende.
Yá tan tolos antiasturianos xuntos...
El Partíu Popular súmase a PSOE, UGT y CC.OO. contra la valoración del asturianu nes oposiciones
Esto ye ablucante: "El PP nunca votará pa discriminar a les persones según la llingua que falen" por eso glayen tanto los del PP cuando munchos rapacinos que se crien n'asturiano na so casa sufren una "inmersión" nel castellán el primer día que va a la escuela y al final son desviaos a "educación especial" por nun entender bien l'únicu idioma oficial.
Van venir malos tiempos. Si nun pesamos en política nun vamos facer nada.
Pues queden un par d'añinos pa les elecciones y les coses nun tienen traza de dir pa meyor. Espera ver si los d' UPyD nun terminen sacando escañu.
Claro que lu van sacar. Ya pueden poner les piles los de la UNA pa intentar entrar en 2011 na xunta xeneral porque UPyD si nun desinfla van entrar. Solo faltaba que nun tuvieremos nacionalismu asturianu y pa enriba tener nacionalismu español. Estos sacaron 9.000 nes xenerales.
¿Cuántos faen falta pa un escañu n'Asturies?
Pémeque anden alredor de los 15.000 votos necesarios pa sacar un escañu.
Depende de la participación, nel 2003 URAS sacó 17.000 votos y nun tuvo representación. Nestes autonómiques de Galicia y Pais Vasco duplicaron los resultaos de les xenerales asina que n'Asturies deben tar raspiando'l diputau, de toes maneres entá queda muncho pales autonómiques y pueden acabar desinflándose como "Ciutadans".
Y nun nos fagamos ilusiones otra vez, el nacionalismu ta n'hores baxes en tol estau y en retirada nos llugares onde más apoyu tenía, asina qu'equí que nunca tuvo muncha fuerza la situación ye desastrosa, tamos como nos años 80, la única posibilidá ye la unidá cola derecha, que UNA vaya a les elecciones con Union Asturianista anque sé que ye casi imposible.
Dáivos cuenta d'una vez que pal psoe, cagar pal asturianu ye un méritu, metelu en cuchos y chigres, el que lo faiga pa ellos tien méritu y medra, mirái la chelo...
"Pol fechu de falar una llingua nun se pue aumentar la puntuación nuna oposición determinada". Quien rosnó lo anterior, ¿diz lo mesmu sobre´l conocimientu del catalán o'l gallegu nes sos respeutivos llugares? Tal paez que la esquizofrenia llingüística de la FSA contaxara a CCOO y UXT. Si esa ye la opinión de estos "defensores de los trabayadores", ¿qué faen nas manifestaciones pola oficialidá del asturianu y del gallegu-asturianu? Esta xente, enantes de falar d'oreya, tendrían que lleer bien la propuesta del Conceyu de Cangas del Narcea y la Llei d'Usu y Promoción del Asturianu.