Galicia voltia los resultaos d'hai cuatro años y da-y mayoría al PP

El resultáu de les elecciones nel país vecín foron una sorpresa p'abondos qu'esperaben la repetición del bipartitu ente socialistes y nacionalistes. El PP gatuñó un escañu al BNG na Coruña y otru al PSOE en Pontevedra, colo qu'aseguró la mayoría absoluta.

 
Les últimes encuestes de campaña la selmana pasada, que nun se pudieron facer públiques, yá apuntaben la suba del PP, que paradoxicamente foi beneficiáu pola participación alta. El BNG y el PSOE nun foron a rentabilizar la so presencia ne gobiernu y perdieron ente los dos más de 100.000 votos y 3 puntos porcentuales caún.
 
Per otru llau, UPyD conviértese na cuarta fuerza política de Galicia con más de 20.000 votos, triplicando asina los resultaos d'hai menos d'un añu nes elecciones xenerales, y apaez con daqué más del 1% y 18.000 votos Terra Galega, un partíu galleguista de centru con fuercia en delles comarques d'A Coruña. Estos dos partíos perpasen a IU-EU que ye asina la sexta fuercia política anque meyora llixeramente en númberu de votos.
 
Otres fuercies nacionalistes como FPG o NOS-Up algamen resultaos testimoniales (0'2% y 0'1% respectivamente), y vense superaos por partíos como Os Verdes y PUM+J.