La SGAE aconcéyase con varies bandes de gaites
|
21 Febreru, 2009 por Rubén Ardura
- Inicie sesión o rexístrese pa espublizar comentarios
La SGAE llamó a conceyu a les bandes de gaites. Na mañana del xueves día 19 aconceyáronse los directores de diez bandes de gaites d'Asturies col gaiteru José Ángel Hevia, conseyeru de la SGAE, y Javier Vidal, director de la mencionada entidá nel noroeste. L'oxetivu del alcuentru yera sensibilizar a los directores sobre los derechos d'autor, tanto en pieces orixinales como n'arreglos sobre temes tradicionales.
Al conceyu asistieron representantes de les bandes Ciudad de Oviedo; Avante Cuideiru; Tabladar; La Raitana; La Laguna del Torollu; Soto de Rei; Villa de Mieres; Fonte Fuécara; La Reina del Truébano; y Candás. Como idega principal del conceyu, José Ángel Hevia aconseyó a estes bandes que "nun tenemos que subestimar la importancia del arreglu na música tradicional". Pa José Ángel Hevia "la eclosión de les bandes de gaites entamó a últimos de los 80; y ya nos 90, aquellos proyectos fueron garrando importancia y medró'l trabayu d'arreglos y orquestación, casi siempre realizáu pol director de la banda. Esti llabor, importantísimu y mui ellaboráu, tien de ser valoráu". La SGAE cobra polos derechos d'autor que xeneren pieces orixinales creaes por un autor, pero tamién por pieces tradicionales a les que se faigan arreglos, casu esti últimu que se da bien de veces tanto na música de les bandes de gaites, músicos solistes,como nos grupos folk. Nesti sen la SGAE entiende como arreglu musical" l'axuste de la forma d'espresión d'una obra musical pa fines especiales, según los requisitos d'una orquesta determinada , d'un instrumento musical, de la escala real de la voz d'un cantante, etc."
Como consecuencia de lo anterior, la SGAE reconoz que percibe derechos d'autor derivaos de pasacais y de la edición de discos de bandes de gaites. La SGAE considera que los arreglos u orquestaciones del repertoriu popular nun son d'identificación cenciella, colo qu'anima a los gaiteros y gaiteres a rexistrar el so trabayu "facilitando d'esta manera'l llabor de repartu d'ingresos que por derechu-yos pertenecen". Asina Hevia resumió que "tenemos un bon númberu de creadores mui activos nes bandes de gaites, y arriendes de facer rescamplar les sos composiciones orixinales, queremos reivindicar tamién el so trabayu na tresmisión y adaptación de la nuestra música tradicional: por ellos pasa'l futuru del nuestru llegáu musical y ye xustu que se reconoza el so pesu na autoría" La SGAE dio anuncia de la celebración de más conceyos d'esti tipu p'afondar nes idegues plantegaes nesti primer alcuentru.
La cita ente les bandes y la SGAE dase coincidiendo cola polémica entamada pol cobru de derechos sobre l'himnu d'Asturies y el d'Andalucía. En concreto n'Asturies, la SGAE reconoz que tien rexistraes más de 20 versiones del himnu de les que cobra, quitando n'actos oficiales, relixosos y desfiles militares. Pero l'himnu d'Asturies nun ye un casu únicu, ya qu' hai un cientu de cantares tradicionales asturianos que tiene rexistraos arreglos na SGAE. Lo complicao de separar ente una interpretación tradicional y una qu'use arreglos rexistraos, ye'l puntu que determina si una execución d'un tema tradicional xenera o non derechos d'autor
Efrén d'Andrés
Lo + visto de la selmana
Comentarios
A mi esto dame munchu mieu, vas acabar pagando hasta por tener un istrumentu, nun vaya ser que toques musica rexistrao y nun pagues a la SGAE. Paezme que va pasar igual que coles discos duros, cds virxenes, etc, que por si acasu copies musica, pagues primeru...
De xuru hai otra triba de llicencies a les que se pueden acoyer les bandes de gaites, y que nun pasen pela SGAE.
La Marcha del dos de Mayu ye tradicional. Si yo-y faigo un arreglu pa la mio banda de gaites, será la MIO VERSION, nun tengo porqué paga-y a naide. Y si otra banda de gaites toca la MIO VERSION, pues p'alantre, que yos vaya bien, con dicir el nome o la fonte la versión basta. Somos persones, non chupasangres. Nun tengo porqué rexistrar res, que ye lo que la SGAE pretende, pa llueu cobrar por ello. Cobro nos festivales, por tocar les canciones TRADICIONALES del mio pais, con o ensin arreglos. Si toco Scotland the Brave, a quién-y va a dar les perres la SGAE? Van dir hasta Escocia a buscar al autor? La música tradicional ye eso. Quien rexistre adaptaciones de canciones tradicionales con porgüeyu económicu, nun ta trabayando pola cultura asturiana, sinón por perres.
Non a la SGAE, deprendéi de K-Nalón.
Ye lo mesmo que si rexistro la Chopa a la sidre. Nin la chopa me pertenez, (nun se pue rexistrar) nin el mou tradicional de facer sidre :
Si espublizo, y rexistro una receta de cocina de "cómo facer la Chopa a la Sidre", taré adueñándome de daqué que NUN YE MÍO. Son los mios "arreglos" a la receta. Si ficiese eso, cada vegada que daquién usase la mio receta, tendría que pagame un "canon" pola propiedá intelectual y/o artística que yo punxe pa facer esa receta. Y como sería imposible saber quién ta faciendo en so casa la "mio receta" desixiría que tol mundu pagase un impuestu sobro la Chopa, y sobro la Sidre (que ye lo mesmo que se fai colos discos duros y pc's), presuponiendo que, si compres Chopa, vas a "piratear" la mio receta, llamándote lladrón d'antemano.
Esti de la SGAE, ye'l negociu del sieglu.
Hai que dir a la raiz del problema.
El problema nun ye qu'haiga xente que nun tea cobrando los drechos que xenera la música tradicional, non. El problema ye que la música tradicional, de dominu colectivu y patrimoniu cultural de toos, xenera beneficios a la SGAE. La difusión de la cutlrura tradicional nun pue ser un cargu economicu pa quienes pretenden faer muestres festivales o simplemente interpretalo. Nun se pue permitir que la SGAE cobre hasta sangrar, a los fetibales folcloricos, muestres ...
Nun se pue permitir que la SGAE seya la defensora dun patrimoniu común, porque la SGAE, ye una mera maquina de recaudación que beneficia a unos pocos a costa del dineru de toos.
Hai otres formes de protexer la nuestra música tradicional, que garantizen la so difusión llibre y gratuita, que ye lo que necesita la cultura. Son les llicencies copilefht.
Ta dicho.
A mi paezme que l´unicu fin de la SGAE ye cobrar los derechos de ¿autor?, y que nun mira ni pa la música tradicional, ni pa otres musiques. Y ahí ta el problema, contando amás con que hai músicos "militantes" de la cultura tradicional, y músicos que lo único que quieren ye ganar un duru, sea de onde sea y a costa de lo que sea. Ta claro que hai que cobrar pero, ¿onde ta el límite?...
A mi paezme, que ya se pasó y que van matar pocu a pocu la música si siguen asina.
Que la SGAE cobre polos arreglos musicales nes pieces musicales parezme puru filibusterismu, un robu y un piratéu a la cultura popular.
La música tradicional ye nuestra, de tolos asturianos. El que nun la quiera interpretar que nun lo faiga. Pretender sacar porgüeyu d'ella ye d'un miserabilismu que da noxu.
Entrevista a Santi Artime