La radio sueca emite esti domingu un espaciu sobre la música asturiana

Esti domingu 27 de xunu, a les 19.00 hores, la radio pública sueca (Sveriges Radiova) va emitir el capítulu de ‘Musihkka’ dedicáu a la música y la llingua asturiana.

Foi en marzu d'esti añu cuando Petra Quiding y Helepa Lopac tuvieron per Asturies grabando material sobre la música n'asturianu pa una serie de programes sobre delles minoríes llingüístiques europees.

“Musihkka”, (música en sami, anque’l programa ye en suecu), ye un nuevu espaciu de la radio pública sueca que va emitise esti branu y percorrer la música y la historia de diez comunidaes llingüístiques minoritaries d'Europa (Frisia, Escocia, Occitania, Friul, Apulia, Bremen, Letonia, Carelia, Laponia y Asturies).

El programa, d’una hora de duración, ye una de les mayores producciones hasta la fecha de Sveriges Radio y va facer un repasu na primer media hora pola música de los diez países, mientres que na segunda parte va falase del movimientu de reivindicación del idioma, con especial procuru na defensa del idioma al traviés de música.

L’espaciu sobre l’asturianu va emitise esti domingu 27 de xunu a les 19:00h (l'horariu suecu y l'asturianu ye'l mesmu). Sentilo pel internet ye bien fácil, solo hai que entrar na páxina www.sverigesradio.se/p2 y calcar en Lyssna direkt.

Si nun lo podéis sentir esi día, na web www.sverigesradio.se/p2/musihkka va tar disponible a lo llargo d'un mes. Nesta web van tener semeyes y demás coses relacionaes col programa.