Nueva versión d'Ubuntu 10.04 100% n'asturianu

Ubuntu acaba de dar anuncia dende la so web de la nueva versión 10.04, que por primer vegada, tará dafechu n'asturianu gracies al trabayu desinteresáu de Softastur.

Ubuntu ye una distribución GNU/Linux basada en Debian, que ufre un sistema operativu llibre anováu, estable, con un fuerte enfoque na facilidá d'usu y d'instalación del sistema.

Ente les novedaes d’esta nueva versión ta un nuevu tema gráficu ya iconos, un arranque y apagáu más rápidu o un nuevu menú d’estáu del usuariu que tien como oxetivu integrar nel escritoriu Ubuntu les redes sociales qu’usemos (Twitter, Facebook, Identi.ca, etc.).

Mientres que les novedaes respeuto a la nuestra llingua son tornes meyoraes  y dalgunos programes más completaos. Amás, inclúi OpenOffice preinstalada n’asturianu.

La ‘Comunidá Asturiana d'Ubuntu’ y ‘Softastur’ van celebralo esti fin de selmana na Casa de Cultura de Ribeseya. Asina, el vienres van facer una charra introducción al Software Libre a les 17:00 hores. Mientres que’l sábadu van entamar un taller d'instalación d'Ubuntu 10.04 de 11:00 a 13:30 y 16:30 a 18:30, onde los interesaos podrán ver les novedaes, anovar ya instalar esta nueva versión.