Promoción del país ensin la llingua del país

Mercedes Álvarez presentó ayeri nel Teatru de Llaboral Ciudá de la Cultura, el nuevu portal turísticu d'Asturies (www.infoasturias.com), onde la llingua del país ye inesistente.

La nueva versión ñaz, según esplicó la Conseyera de Cultura y Turismu del Principáu, “con una estética más moderna, una estructura más flexible y nueves seiciones pa dar respuesta a les necesidaes de los nuesos potenciales turistes”.

Según el Principáu, la nueva web pretende anovar, actualizar y potenciar el serviciu d'información turística emprestáu pola alministración al traviés d'Internet, incluyendo importantes novedaes na prestación del serviciu d'información turística.

Sicasí, ente eses novedaes nun esiste la posibilidá de restolar pela páxina n’asturianu, como si pasa cola web del Principáu o, dende la selmana pasada, cola de la Universidá. Si podemos facelo n’inglés, francés o alemán, pero l’idioma propiu nun esiste nin nos topónimos del mapa del tiempu que se pue consultar dende la web.

La llingua propia si ta presente nos portales turísticos de les otres comunidaes billingües del Estáu. Asina, ‘Turgalicia’, recibe en gallegu, pero cola posibilidá d’usar nueve idiomes, ente ellos el catalán y el vascu. ‘Catalunya Turisme’ tamién nos recibe nel idioma propiu, anque tamién podemos facelo en francés, español, inglés, alemán y chinu. Los mesmos idiomes, amás del nativu, que tien la páxina del País Vascu. La posibilidá de restolar nel idioma propiu tamién ye posible nes webs turístiques oficiales de Navarra, les Islles Baleares y el País Valencianu.

Novedaes del portal

Ente les principales novedaes de la web destaca'l guetador de central de reserves, que va dexar al viaxeru consultar la disponibilidá de les principales centrales privaes y efeutuar la so reserva d'agospiamientu, al traviés d'una sola busca.

La nueva web apuesta pol serviciu personalizáu, ufiertando la posibilidá de crear rutes ya itinerarios a midida, col sofitu de la tecnoloxía de Google Maps. El sistema RSS ye otra de les incorporaciones tecnolóxiques de la páxina, que van dexar al turista suscribise de forma gratuita a les actualizaciones del portal.

La nueva Infoasturias inclúi, amás, nueves seiciones con más información práctica de serviciu (como “Servicios y trámites”, “Puede resultate útil”, “Entrugues frecuentes”, “El tiempu”, o “Tresportes”), atendiendo a les propuestes d'ociu al traviés d'una completa axenda (agora en portada) y la introducción de suxerencies en toles busques. La Conseyera de Cultura y Turismu espresó'l so enfotu en qu'estes meyores faigan medrar los rexistros de Infoasturias, que rexistró casi un millón d'accesos mientres l'añu 2009.