El Comité d’Espertos sobre les llingües minoritaries y rexonales del Estáu Español del Conseyu d’Europa recomienda una meyora del nivel de protección llegal de la llingüa asturiana. Amás, rescamplen el grau de consensu social a favor de la oficialidá de la llingua.
Cronoloxia
Esta cronoloxía pretende facer un repasu a feches nes que pasaren acontecimientos que de d'una o otra manera supunxenon un fitu na hestoria de la llingua d'Asturies. Esta ye la nuesa clasificación que pol mesmu calter de la mesma nun dexa de ser arbitraria. Sicasí pue valir pa facese una idea de la evolución de la nuesa llingua nel tiempu.
2008: Europa preocúpase pol asturianu
2008: Minor d'asturianu
Dempués d'un polémicu conflictu dientro de la Facultá de Filoloxía pola mayor o menor presencia del idioma nos nuevos títulos universitarios adaptaos al procesu de Bolonia, l'asturianu entra per primer vez dientro de la enseñanza reglada como una minor de 48 créitos. Meses dempués l'asturianu tamién entra en Maxisteriu con un total de 30 créitos.
2009: Creación de la Unidá de Traducción
El Gobiernu alcordó nel mes de marzu la creación de la Unidá de Traducción, departamentu dependiente de la Direición Xeneral de Polítca Llingüística. La so función ye garantizar la exactitú y la equivalencia xurídica de les traducciones ente l'asturianu y el castellanu, ufriendo a l'Alministración pública los oportunos servicios de traducción, interpretación y terminoloxía, dando serviciu tamién a la ciudadanía.
2009: La campaña 'Doi la cara pola oficialidá' algama 10.000 apoyos
Nacida en xunu del 2008, un añu y cinco meses depués, la campaña entamada pol Conceyu Abiertu pola Oficialidá (CAO) 'Doi la cara pola oficialidá' sumaba la semeya númberu 10.000. Ente los participantes, xente de sonadía como Corín Tellado, Víctor Manuel, Manuel Busto, Quini, Villa, Chechu Rubiera o Samuel Sánchez.
2010: Naz TermAst
L'Academia de la Llingua Asturiana, Softastur y el Colexu d'Inxenieros n'Informática del Principáu d'Asturies echen a andar el proyeutu TermAst. Ésti consiste na ellaboración de propuestes terminolóxiques en dellos campos pa da-y usos nuevos a la llingua asturiana. Nel casu de qu'estes pallabres reciban el sofitu de los profesionales del sector, dándo-yos normalidá, la institución académica dirá inxiriéndolos dientro de los calces normativos. La primer propuesta, presentada en febreru del 2010, anque colgada na rede n'ochobre del 2009, foron unos 'Términos básicos d'Economía y Empresa' ellaboraos por Guillermo Ovidio Villa y Fernanda Valdés.
