Espaciu y Tiempu de la Llingua Asturiana

Tas en Espaciu y Tiempu > La llingua asturiana > Sociollingüística

Sociollingüística


Les encuestes que traten el tema de les simpatíes y niveles d'usu del asturianu reflexen dende finales de los 70 unes actitúes positives de los asturianos y asturianes pa cola so llingua. Sicasí un puntu d'inflesión na percepción de la realidá sociollingüística asturiana supúnxolu la realización en 1991, por encargu del gobiernu del Principáu, del primer estudiu sociollingüísticu p'Asturies. Un estudiu ampliu y rigurosu, fechu pol espertu Francisco Llera Ramo qu'amosaba unos niveles d'usu y d'apoyu a la promoción y recuperación de la llingua asturiana mayoritarios na sociedá.


L'estudiu espublizóse nel añu 1994 col títulu Los Asturianos y la Lengua Asturiana. Estudio Sociolingüístico para el Principado de Asturias, Uviéu, 1994.

Nel añu 2001, el mesmu sociólogu realizó una segunda encuesta que s'asoleyó nel 2002. Nesta encuesta espéyase . Nesta encuesta espéyase en xeneral una realidá asemeyada a la de l'antigua encuesta del 1991, anque con una importante evolución al favor de la normalización nel llau positivu pero con una mengua de la comunidá de falantes nel llau negativu.

Los datos de la encuesta del 2001 falen d'un consensu creciente al favor de la normalización en toles estayes de la sociedá de la llingua y tamién de la identificación de los asturianos y asturianes col idioma. Los encuestaos, cuasi unanimemente reconocíen l'asturianu como l'idioma d'Asturies y pidíen un tratu institucional equivalente al que tienen otres llingües d'España. Tolos datos que falen sobre consensu llingüísticu avancen nesta nueva encuesta,meyorándose un poco tolos datos de l'anterior consulta: un 80% de los encuestaos rechacen yá el mitu de qu'espresase n'asturianu ye "falar mal" y el 70% considera que l'asturianu ye una llingua. Entovía más, pa un 66% los términos "bable" y "asturianu" definen una mesma cosa, anque tamién se caltién, no negativo, la idea del asturianu como llingua fragmentada en dialectos ensin posible unidá.

La encuesta analizaba nun segundu bloque los frutos de la evolución del procesu normalizador.Ún de cada tres asturianos de más de 16 años encuestaos deprendiera personalmente o tenía en casa a daquién que deprendió asturianu na escuela, rexistránsose en xeneral un gran avance nel porcentaxe de falantes alfabetizaos, amás del de falantes potenciales y de persones capaces d'entendelo si-yos falen n'asturianu.

Sicasí, la encuesta reconoz un puntu negativu pergrave como ye'l retrocesu xabaz del asturianu como llingua vehicular. La falta de relevu xeneracional a l'altura d'esti añu dexaba al asturianu con un 20% del total de persones encuestaes que lo tuvieren de llingua matern menos que na encuesta del 91, y la comunidá qu'emplega l'asturianu como idioma preferente de comunicación tamién menguaba espectacularmente. El mesmu sociólogu Francisco Llera apuntó a la emigración qu'afectaba a la mocedá asturiano como un factor decisivu qu'afectaba na baxada de la comunidá de falantes peles sos estayes más moces, un fechu agraváu porque la emigración afecta sobremanera a les clases menos pudientes, que, pa más aquello, son les que más asturiano falen.

Tocanta a actitúes y demandes llingüístiques, les persones entrevistaes apuestaben nel 2001 mayoritariamente por un futuru billingüe, anque la opinión al favor d'un monollingüismu castellanu espoxigó bastante de diez años p'acá. Dos de cada tres asturianos queríen que los sos fíos deprendieren asturianu na escuela, y hai un apueste xeneralizáu por una mayor presencia del asturianu nos medios de comunicación. Nesti sentíu, un 50% de los participantes na encuesta estimó que l'asturianu tenía una presencia insuficiente nestos medios, sobremanera en radio y televisión.

Al valorar el llabor institucional en pro de l'asturianu, los encuestaos criticaron al gobiernu más duramente que nel 91. Llama l'atención qu'un 57% d'encuestaos considerare que les instituciones facíen mui poco o que nun faen res pola conservación y promoción del asturianu. A la hora de proponer midíes de normalización, dos de cada tres ciudadanos d'Asturies apostaríen por un asturianu normalizáu, pero respetando les particularidaes de cada llugar y fuxendo siempre d'artificialismos que xeneren una resquiebra ente l'asturianu faláu y el normalizáu. El 88% tan al favor de la presencia del asturianu na escuela, y a la metada de los encuestaos prestaría-yos que fuere llingua vehicular lo menos en parte del procesu educativu.

L'estudiu del 2001 prendía l'alarma pol estancamientu llingüísticu que vien del avieyamientu de los falantes, y pola inesistente política llingüística a lo llargo d'esti tiempu. causes que s'avisaba qu'arrequexaben l'usu del idioma al ámbitu rural y francíen la pervivencia del idioma a lo llargo de la pirámide d'edaes.

Ente toes estes variaciones, la encuesta repitía un datu de 1991, y ello ye que 6 de cada diez asturianos tan al favor de que se-y dea la oficialidá al asturianu. Polos resultaos del Estudiu del 2001 conozse que los asturianos aspiren a una comunidá equilibradamente billingüe, con demanda d'una mayor escolarización y presencia nos medios de comunicación. Casi tolos datos d'esta estaya son positivos, y asina los asturianos tan al favor de la normalización de la llingua, demuestren un bon conocimientu llingüísticu, lo que ye amuesa de la xunidá del idioma y son críticos cola falta de polítiques llingüístiques.

Como encargu particular del ayuntamientu de Xixón, Llera Ramo fexo nel 2004 una encuesta sociollingüística específica pa esti conceyu, el mayor d'Asturies con más de 250.000 habitantes.

Los datos del estudiu concretu pa Xixón nun se separten demasiao de los que dio la encuesta xeneral d'Asturies, anque evidentemente, hai delles particularidaes propies d'un conceyu que, amás de ser el más grande d'Asturies por población, ye tamién ún de los que tienen una estructura más complicada, amestando xente de toles procedencies.

D'esta manera, una gran mayoría que reconoz l'asturianu como llingua propia d'Asturies y los más de los encuestaos tamién ven qu'asturianu y castellanu son llingües diferenciaes. Sicasí, y anque un 53% de xixoneses tuvieron l'asturianu como llingua materna, a la hora de falar na llingua la ciudá ta perbaxo de la media d'Asturies, y solo un 40% reconocen que lo empleguen, ello con tener un 82% de falantes pasivos qu'entienden cuando se-yos fala n'asturianu. Los más de los xixoneses tiren del castellanu pa espresase en contestos sociales que salgan fuera del círculu d'amigos y familiares. Nel capítulu de les voluntaes y intenciones, el 49% dicen que-yos prestaría recibir clas d'asturianu y un 62% tan a favor de que s'alfabetice a los sos fíos en llingua.

Sobre la política llingüística del conceyu y d'Asturies, la encuesta local de Xixón repite los datos de la xeneral. Ello ye, el 75% de los xixoneses dicen que les instituciones nun faen abondo pola recuperación del idioma, y les campañes de promoción que se faen resulten "invisibles" énte la población, tanto que namás un 15% de los encuestaos conocen de la esistencia de la Oficina de la Llingua. Un 68% piden una actuación más valiente por parte de les instituciones y un 49% incluso reclamen qu'haya funcionarios capacitaos n'asturianu nel Ayuntamientu. Un 57% dicen que-yos prestaría sentir a l'alcaldesa y otros representantes públicos falar n'asturianu anque ello namás fuere ocasionalmente, y hai un sentir mayoritariu al favor de que publicaciones como La Gaceta del Ayuntamientu enxerten más artículos n'asturianu. Mayoritaria tamién (71%) ye la petición de qu'acontecimientos importantes de la ciudá, casu del Festival de Cine y otros, s'anuncien n'asturianu, una demanda que'l 48% faen estensiva a ún de los símbolos de la ciudá, el Sporting.


Identidá Llingüística

 

Denominación de la fala propia en %

Asturiano o bable 73
Asturiano central 8
Asturiano occidental 4
Asturiano oriental 1
Fala local 3
Otres 10
NS/NC 1
. 100



 

Primer llingua de la infancia en %

Asturianu 36
Castellanu 32
Les dos 6
Una mezcla 24
Otra 2
NS/NC -
. 10



 

Primer llingua de la infancia según grupos d'edá en %

Respuestes 16/17 18/21 22/25 26/35 36/45 46/60 >60 Total
Asturianu 15 21 29 25 36 39 51 36
Castellanu 43 41 50 36 32 28 24 32
Les dos 11 1 4 4 9 4 8 6
Una mezcla 31 32 17 34 21 24 16 24
Otra - 5 - 1 2 5 1 2
. 100 100 100 100 100 100 100 100



 

La llingua propia d'Asturies en %

Asturianu 44
Castellanu 19
Les dos 35
NS/NC 2
. 100



 

La llingua propia d'Asturies según primer llingua (en %)

Llingua d'Asturies/ Primer llingua Asturianu Castellanu Les dos Mezcla Total
Asturianu 64 28 42 37 44
Castellanu 6 36 20 15 19
Les dos 29 32 35 45 35
NS/NC 1 4 3 3 2
. 100 100 100 100 100



 

Asturiano o bable en %

Son lo mesmo 53
Coses distintes 42
NS/NC 5
. 100



 

Argumentos pa dicir qu'asturianu y bable son coses distintes (en %)
(entruga fecha a los que respondieren que yeren coses distintes)

Argumentos Non Nun sabe %
Asturianu ye lo que se fala normalmente 72 24 4 100
Bable ye l'asturianu cerráu y primitivu 66 27 7 100
Bable ye l'asturianu artificial y inventáu 22 66 12 100
Bable ye l'asturianu de la zona central 12 71 18 100

L'espaciu social de la llingua asturiana

 

Llingua d'espresión más fácil en %

Castellanu 47
Asturianu 30
Les dos 16
Depende 6
NS/NC 1



 

Conocimientu del castellanu en %

  Perbien Abondo bien Regular Abondo mal Permal
Entiende 51 41 7 1 -
Fala 34 45 18 3 -
Llee 43 48 6 2 1
Escribe 36 47 13 2 2



 

Conocimientu del asturianu en %

  Perbien Abondo bien Regular Abondo mal Permal
Entiende 27 41 22 5 -
Fala 14 30 28 13 15
Llee 6 21 31 18 24
Escribe 3 10 25 23 39



 

Equiparación del asturianu con otres llingües peninsulares en %

60
Non 32
Depende 4
NS/ NC 4



 

Demanda de normalización del asturianu en %

Sí, ye necesario 36
Sí, non artificial 16
Sí, respetando les variantes 15
Non. Hai pluralidá de fales 12
Non, n'absoluto 10
NS/NC 11



 

Demanda d'oficialidá del asturianu en %

Alcuerdu dafechu 50
Alcuerdu parcial 12
Indiferencia 15
Desalcuerdu parcial 7
Desalcuerdu dafechu 14
NS/NC 2



 

En rellación col asturianu les instituciones faen (en %)

Nada 15
Poco 32
Pueden facer más 24
Faen lo que pueden 14
NS/NC 15



 

Llingua de la señalización en %

Asturianu 11
Castellanu 22
Billingüe 59
Indistinto 6
NS/NC 2

Usos y vezos llingüísticos

 

Llingua emplegada cuando se conoz a una persona en %

Castellanu 53
Castellanu > Asturianu 9
Indistinto 20
Asturianu > Castellanu 10
Asturianu 8



 

Preferencia d'usu llingüísticu acordies cola situación (en %)

SITUACIÓN Castellanu Asturianu Les dos NS/ NC
Familia 36 42 21 1
Temes personales 39 37 21 3
Amigos 35 38 25 2
Trabayu 40 25 17 18
Estudios 46 17 12 25
Compres 47 27 21 5
Bancu 58 23 17 2
Médicu 60 22 17 1
Parroquia 50 26 16 8
Política 50 22 16 12
Conceyu 57 22 15 6
Oficines públiques 73 14 10 3
Teléfonu 44 24 29 3



 

Estimación de los falantes d'asturianu nel propiu pueblu, zona y Asturies en %

Cantidá Pueblu/ ciudá Zona Asturies
Naide/ casi naide 16 9 2
Pocos 19 23 16
Menos de la metada 6 10 16
La metada 12 17 26
Los más 25 24 24
Toos/ casi toos 8 12 5
NS/NC 6 5 11



 

Espectatives de recuperación/ retrocesu llingüísticu (en %)

Muncho menos 6
Daqué menos 14
Asemeyao 34
Daqué más 27
Muncho más 8
NS/NC 11



 

Comparanza ente l'asturianu escritu y el que se fala na cai (en %)

Nada que ver 7
poco que ver 27
Daqué que ver 24
Bastante asemeyao 22
Mui asemeyao 7
Igual 2



 

Comparanza ente l'asturianu faláu na televisión y el que se fala na cai (en %)

Nada que ver 20
poco que ver 34
Daqué que ver 19
Bastante asemeyao 18
Mui asemeyao 4
Igual 3

Actitúes y demandes llingüístiques

 

Posición ente l'asturianu en %

Ensin interés 19
Gustaría-y deprender 12
Ta deprendiendo 1
Entiende 24
Fala 30
Llee 8
Escribe 6



 

Evolución del posicionamientu ente l'asturianu dende 1983 (en %)

Posicionamientu 1983 1991
Ensin interés 38 19
Gustaría-y deprender 21 12
Ta deprendiendo 1 1
Entiende 28 24
Fala 7 30
Llee 4 8
Escribe 1 6



 

Interés por saber asturianu (en %)

65
Non 13
Depende/Indiferente 21
NS/NC 1



 

Voluntá de reproducción interxeneracional (en %)

67
Non 11
Depende/Indiferente 21
NS/NC 1



 

Oxetivos coleutivos pa cola llingua asturiana (en %)

Abandonala 2
Dexar inercia 15
Caltenela 10
Deprendela voluntariamente 39
Entiendan toos 12
Falen toos 16
Llingua diaria 5



 

Demanda de presencia del asturianu en Medios y revistes (en %)

Dalgún namás n'asturianu

  periódicos revistes
66 67
Non 23 23
NSNC 11 10



 

Con estayes n'asturianu

  periódicos revistes
Toos 22 21
Los más 14 14
Dalgún 47 47
Nengún 10 11
NS/NC 7 7



 

Demanda de programación n'asturianu na radio y TV (en %)

N'asturianu dafechu

  Radio Radio
63 59
Non 29 32
NS/NC 8 9



 

Programación n'asturianu

  Radio TV
Nenguna 11 11
Menos del 10% 20 23
Hasta 1/4 27 24
La metada 24 23
Lo más 9 8
Toos 3 3
NS/NC 6 8



 

Asturianu nes escueles

Obligatorio 17
Voluntario 71
Nun estudiar 9
NS/NC 3

SOCIOLLINGÜÍSTICA EN LLEÓN

Nel añu 2006 l'Academia de la Llingua Asturiana espubliza “ Estudiu Sociollingüísticu del Norte de Lleón”, un trabayu de Xosé Antón González Riaño y Xosé Lluis García Arias que constitúi'l primer estudiu sobre la identidá, conciencia d'usu y actitúes llingüístiques nes fasteres llioneses del Dominiu Llingüísiticu Ástur más averaes a Asturies. Nel estudiu encuestóse a 400 persones de los 17 conceyos lleoneses que llenden con Asturies. D´ente tolos encuestaos, el 18,5 por cientu noma a la fala propia d´eses tierres como asturlleonés, mientres que'l 15,7 por cientu quier falar más de castellán y el 15,5 por cientu de "pal.luezu", términu esti que namás cinca a la faza l.lacianiega y la so redolada. Otru 15,5 por cientu identifícala col términu "bable", el 8,7 por cientu fala de "l.lacianiegu" y el 5 por cientu d'asturianu. Los nomes bable y asturlleonés son los preferíos de la xente más mozo, mentantu que castellán ye'l preferíu polos más vieyos, dalgo que lleva a los autores a pescanciar que la xente más mozo de la fastera norlleonesa paez que sigue, pelo menos de lloñe, el procesu asturianu y d'ello surde daqué identificación con él y nun tien prexuiciu a identificar la so fala col nome asturlleonés, asturianu o, col más neutru, bable.
 

 

 

El 50 por cientu d'habitantes d'estos conceyos refuga la esistencia de la unidá de la llingua a ún y otru llau del Cordal, anque ven qu'hai unes semeyances pergrandes ente la so fala y l'asturianu. El 54 por cientu de los encuestaos refuga que l'asturianu seya una llingua, mientres que'l 37por cientu diz que sí. La mayoría de los encuestaos entamen falando asturianu de neños y acabaron falando castellán d'adultos. Nel estudiu pue vese qu'hai un sentimientu de conservación del idioma nestos conceyos, anque ensin querer la oficialidá de la llingua. Gran parte de los entrevistaos ta d'alcuerdu cola collaboración ente Asturies y Lleón na política llingüística y cola entrada del idioma nes escueles. L'estudiu conclúi que nun hai estigma llingüísticu, yá que la mayoría d'encuestaos nun percibe'l so idioma como "falar mal".
 

Dos años dempués, en 2008, Xosé Antón González Riaño y Xosé Lluis García Arias ampliaron l'estudiu al territoriu de tola provincia de Lleón. Pa facer "Estudiu sociollingüísticu de Lleón. Identidá, conciencia d´usu y actitúes llingüístiques de la población lleonesa" entrevistaron a 500 llioneses. Nel trabayu descúbrese que nel país vecín hai un 10 por cientu de falantes d'asturianu, unes 50.000 persones concentraes sobremanera nes comarques de Babia, L.laciana, La Montaña y Cabreira. Anque nel estudiu pue vese que nun esiste un nome común pal idioma, siendo'l más común el de lleonés (27,8 por cientu), mientres qu'un 9,9 por cientu fala d'asturlleonés y un 5 por cientu de bable.

Un 70 por cientu de los lleoneses camienta que'l idoma ye parte de la cultura de la so tierra, pero un 60 por cientu nun cree que tenga l'estatus de llingua, anque un 78 por cientu piensa que falar l'idioma propiu nun ye falar mal. La llingua mayoritaría de los lleoneses nos sos primeros años ye'l castellán y namás el 15% de los neños tien l'asturianu como idioma maternu, mientres qu'un 32 por cientu fala un amestao de les dos llingües. Namás un 2 por cientu de los lleoneses desconoz dafechu la llingua. Mientres, un 70 por cientu de la población reconoz el peligru de que'l idioma propiu desapaeza.

Un 83 por cientu de lleoneses demanda que les instituciones desendolquen polítiques de protección del idioma, sobre too nes comarques de L.laciana y Babia. Casi'l 70 por cientu de la población quier qu'estes polítiques seyan feches a comuña ente Asturies y Lleón. Sicasí, un 66 por cientu nun ta d'alcuerdu en qu'asturianu y lleonés sían la mesma cosa. La metá de los lleoneses quier que la llingua tea recoyida nel Estatutu, mientres que'l 63 por cientu ta pol estudiu nes escueles del idioma propiu.

SOCIOLLINGÜÍSTICA NEL OCCIDENTE DE ZAMORA

Un estudiu sociollingüísticu na zona que comprende Senabria, La Carbayeda, Aliste y Sayago, esto ye, la fastera occidental de Zamora, foi l’estudiu sociollingüísticu siguiente de dominiu asturllionés entamáu por Xosé Antón González Riaño y Xosé Lluis García Arias. Ésti espublizólu nel añu 2011 l’Academia de la Llingua Asturiana (ALLA) baxo’l nome de ‘Estudiu sociollingüísticu de Zamora (Fastera occidental)’, llibru que suma’l númberu 6 de la Estaya Sociollingüística de la institución académica.
 
 
Ente los datos qu’inclúi esti trabayu destaca qu’un 14,5 por cientu de los encuestaos considera que la so forma de falar se paez cola de dalgún puntu d’Asturies, por un 57,5 que niega esa posiblidá. La perda de presencia del nueso idioma nel llugar tamién se demuestra con que más de la metá  nun considera l’asturlleonés de la zona una llingua, siendo del 62 por cientu’l porcentaxe de les persones qu’entiende que nun se diferencia nada del castellanu. Ello lleva a los autores a reseñar qu’un porcentaxe importante de la población nun tien conciencia de les sos peculiaridaes llingüístiques.
 
 
Otra manera, un terciu de los ciudadanos afirmen entender y falar la llingua tradicional, lo que suponen 9.400 persones, anque’l porcentaxe de persones que diz usar la fala de llugar cola so familia ye de namái’l 9,3 por cientu, sobre manera en Senabria. Un 60 por cientu considera que nel llugar namás se fala castellanu, por un 40 por cientu que piensa que l’asturlleonés entovía tien usu. Amás, un 21 por por cientu diz que fala un amestáu d’asturlleonés y castellanu.
 
 
Pa referise a la fala del llugar, un 42,3 por cientu llámalu castellanu, mentes qu’un 30 por ciento refierse a él como gallegu, gallego-castellanu o gallegu-portugués. Otros, alredor del 6 por cientu, defínelu cola denominación llocal, como sayagués o alistanu. Llama l’atención que namái’l 2 por cientu de les persones encuestaes rellaciones esa fala col asturlleonés.
 
La puesta en marcha de collaboración entre les alministraciones d’Asturies, Lleón y Zamora en materia llingüística ye bien vista por más de la metá de los encuestaos, con una incidencia especial en Senabria, mentes qu’un 44 por cientu ye favoratible a la escolarización na so fala tradicional. Otru datu pa la esperanza ye qu’ún de cada diez persones tien conciencia de xunidá llingüística, una sensación que ye mayor ente la xente mozo ilustrao.

ESTUDIU SOBRE'L VALIR DE LA ESCOLARIZACIÓN EN LLINGUA ASTURIANA

N’avientu del 2013, l’Academia de la Llingua Asturiana presentó l’avance de resultaos del estudiu ‘Valir cultural y educativu de la escolarización de la llingua asturiana’, ellaboráu por Isabel Hervia Artime, del departamentu de Ciencies de la Educación de la Universidá d’Uviéu. Ésti consisitió nun cuestionariu en castellanu autoalministráu, aplicáu per mediu d’entrevista personal de mou presencial ente marzu y mayu del 2012 a direutivos de colexos públicos de Primaria. En total, Hevia visitó 148 colexos de 63 conceyos escoyíos de forma aleatoria y estratificada d’ente un universu de 240. D’ellos, 85 foron de la zona centru, 26 de les cuenques, 24 del occidente y 13 del oriente.
 
 
El 55,40 por cientu de les persones que respondieron foron direutores, por un 26,40 de xefes d’estudiu y un 10,10 por cientu de secretarios énte l’ausencia de los primeros, mentes qu’un 8,10 por ciento prefirió nun reflexar el so cargu nel cuestionariu. Un 58,10 por cientu de los encuestaos foron muyeres y la media d’edá foi “relativamente alta”, 48 años, con 22,7 años na docencia. Ocho de cada diez xestores manifestó conocer la llingua asturiana, un datu “bastante esperanzador al comprobase que nos equipos direutivos hai una base social que, de combinase con una política educativa afayadiza, favorecería una meyora de los niveles de conocencia del asturianu de los escolinos y, por tanto, tamién de la sociedá en xeneral”, afirmó Hevia na presentación de los datos. Amás, un 66,90 por cientu afirmó emplegala na so vida diaria, mentes qu’un 13,5 por cientu dixo nun utilizala pese a conocela.
 
 
Los datos completos del estudiu conoceránse en primavera del 2014 nel númberu próximu de ‘Lletres asturianes’.
 
 
Resultaos de la muestra:
 
 
El cuestionariu utilizáu nesta investigación ta compuestu por 16 afirmaciones sobre la Llingua Asturiana –na zona del Eo-Navia, éstes refiérense al gallego-asturiano–, cola opción d’escoyer cuatro respuestes: ‘nada de acuerdo’, ‘poco de acuerdo’, ‘bastante de acuerdo’ y ‘muy de acuerdo’. Les más destacaes son les siguientes:
 
 
-‘L’asturianu ye un valor cultural d’especial importancia p’Asturies’: 57,40 por cientu, mui d’alcuerdu; un 37,20, abondo d’alcuerdu; un 4,1, poco d’alcuerdu; y un 1,40 por cientu, nada d’alcuerdu.
 
 
-‘Merez la pena que los escolinos y escolines conozan, aprenda y utilicen l’asturianu’: 61,50 por cientu, mui d’alcuerdu; un 33,80, abondo d’alcuerdu; un 3,40 por cientu, poco d’alcuerdu; y un 1,40, nada d’alcuerdu.
 
 
-‘Ye lóxico que l’asturianu forma parte del currículum escolar n’Asturies, como asocede coles sos llingües n’otres comunidaes billingües del Estáu’: un 54,70 por cientu, mui d’alcuerdu; un 36,50, abondo d’alcuerdu; un 5,40, poco d’alcuerdu; y un 2,70, nada d’alcuerdu.
 
 
-‘Les lleis educatives han de garantizar una presencia normal del asturianu nel sistema educativu d’Asturies: 54,10 por cientu, mui d’alcuerdu; un 39,90, abondo d’alcuerdu; un 4,10, poco d’alcuerdu; y un 2, nada d’alcuerdu.
 
 
-‘L’asturianu ha estudiase de manera coordinada col castellán y la llingua estranxera’: 39,90 por cientu, mui d’alcuerdu; un 44,60, abondo d’alcuerdu; un 14, poco d’alcuerdu; y un 2, nada d’alcuerdu.
 
 
-‘L’asturianu habría tar más sofitáu pola alministración educativa pa una meyor implantación nos centros’: 52,70 por cientu, mui d’alcuerdu; un 35,80, abondo d’alcuerdu; un 7,40, poco d’alcuerdu; y un 2,70, nada d’alcuerdu.
 
 
-‘Ye necesaria la especialidá d’asturianu pal profesoráu, de mou que la so situación profesional seya homologable a la del restu de docentes’: 58,10 por cientu, mui d’alcuerdu; un 31,8, abondo d’alcuerdu; un 6,10 por cientu, poco d’alcuerdu; y un 2,70, nada d’alcuerdu.
 
 
-‘La co-oficialidá del asturianu ayudaría al afitamientu y dignificación d’esta área nel sistema educativu’: un 43,20 por cientu, mui d’alcuerdu; un 37,80, abondo d’alcuerdu; un 10,8, poco d’alcuerdu; y un 4,70 nada d’alcuerdu. 
 
 
Conclusiones:
 
 
-El nivel de conocencia y usu del asturianu por parte de los Equipos Direutivos ye especialmente altu y tresmítenos la idea de que la llingua asturiana na vida de los centros pue tener una viabilidá inmediata, si se tomen les midíes alministratives afayadices.
 
 
-Paez indiscutible'l valir social y educativu de la llingua asturiana según les opinions de los direutivos de los centros públicos d'Educación Primaria; poro, refúgase dafechu cualquier decisión que ponga en peligru la sobrevivencia na vida pública y escolar.
 
 
-La presencia del asturianu nel currículum ye rentable, al marxe del so valir como ferramienta p’algamar una competencia plena nesta llingua, dende’l puntu de vista de la so rellación con otres árees del currículum y como sofitu necesariu na adquisición de les competencias básiques.
 
 
-Los direutivos de centros camienten, de mou inequívocu, que la presencia de la llingua asturiana precisa d’un mayor compromisu de l’alministración educativa pa facese más efeutiva, cuestión ésta qu’enllaza col fechu de la necesidá d’una regulación llegal en positivo y acordies col marcu llegal.
 
 
-La co-oficialidá de la llingua asturiana contribuyiría a iguar munchos de los problemes curriculares d’esta materia, como puen ser la so presencia normal en toles etapes y niveles educativos, la generalización a tolos centros al marxe de la so titularidá y l’usu del asturianu como llingua vehicular pal tratamientu de determinaos conteníos non llingüísticos.
 
 
-Los resultaos de la investigación son coherentes dafechu colos d’estudios sociollingüísticos anteriormente fechos n’Asturies, pero tienen la importancia de la so focalización nun ámbitu especialmente ‘sensible’ y ‘estratéxicu’: los equipos direutivos de centros escolares.
 

III Encuesta Sociollingüística d'Asturies

El 28 de xunu del 2017 avanzábense los datos de la III Encuesta Sociollingüística d'Asturies, encargada pola Academia de la Llingua Asturiana tamién a Francisco José Llera Ramo. La encuesta ellaboróse al traviés de 600 entrevistes feches nel domiciliu del encuestáu ente la población asturiana mayor de 16 años nun marcu temporal que va dende'l 30 de marzu y el 23 d’abril de 2017.

La falta de presupuestu impidió que fora más fonda que les anteriores y que tamién nun se pudiera llevar la encuesta a la fastera del Navia-Eo, polo que dende la institución académica afalaron al Gobiernu a ampliar esti estudiu tamién al gallego-asturiano. El datu principal ye que'l 53 por cientu sofita la oficialidá del asturianu, polo que la población asturiana sigue sofitando esta demanda. Namái un 25 por cientu amuésase contrariu.

Éstes son les conclusiones más destacaes del estudiu:

  1. Caltiénse’l consensu mayoritariu sobre la identidá llingüística asturiana: pal 65 por cientu la llingua vernácula d’Asturies ye l’asturianu/bable/llingua asturiana.
  2. La mayoría equipara la llingua vernácula al restu de llingües reconocíes n’España: el 53 por cientu nun dulda en que la so llingua ye igual que les demás, sicasí, el retroceso en 15 años ye de 18 puntos.
  3. Demanda casi unánime d’un tratu del asturianu equiparable al restu de llingües del Estáu: 8 de cada 10 sofítenlo, mesma cifra qu’hai 15 años.
  4. Desapaición progresiva y casi total del estigma llingüísticu ente los asturianos: 9 de cada 10 refuga la idea de qu’espresase n’asturianu sía falar mal y en castellanu, bien.
  5. Hai más falantes y más alfabetizaos: pasamos d’un 12 por cientu de falantes alfabetizaos nel 1983 a un 62 por cientu de falantes, de los que más de la metá tán alfabetizaos (38 por cientu). El nivel de falantes potenciales pasa del 40 por cientu al 90 por cientu anguaño, con un incrementu de 8 puntos na década última.
  6. Avanza con fuercia l’alfabetización: el 45 por cientu de los mayores de 16 años estudió personalmente asturianu o tien nel so entornu inmediatu fíos (11 por cientu), familiares (12 por cientu) o amigos (10 por cientu) que lo fixeron. Xubi nel so conxuntu en 11 puntos.
  7. La perceición d’estabilidá del asturianu faláu como llingua vehicular: el 11 por cientu prefier lleer n’asturianu, un 22 por cientu indistintamente n’asturianu o en castellanu y un 60 por cientu namái en castellanu, lo que Llera Ramo considera un avance cualitativu. El 37 por cientu diz falar n’asturianu con más comodidá, el 34 por cientu indistintamente n’asturianu o en castellanu, y un 27 por cientu en castellanu.
  8. Avance nidiu del asturianu como llingua pa la rellación social: anque’l castellanu sigue siendo preferente, ente’l 40 y el 56 por cientu, hai una avance del asturianu nesi sen.
  9. Recuperación interxeneracional: el 54 por cientu tien l’asturianu o indistintamente l’asturianu y el castellanu como llingua infantil, 13 puntos más qu’hai 15 años, frente al 42 que dixo tener el castellanu.
  10. Moderada recuperación del optimismu sobre’l futuru inciertu del asturianu: el 50 por cientu considera que l’asturianu va falase paecío nos diez años próximos, por un 10 por cientu que cree que más y un 30 por cientu que menos.
  11. Líxera polarización de la definición billingüe de la comunidá asturiana: el 34 por cientu considera l’asturianu y el castellanu llingües propies d’Asturies, por un 36 por cientu del asturianu y un 29 por cientu del castellanu.
  12. Caltiénse estable la preferencia por un horizonte billingüe p’Asturies: un 49 por cientu aspira a un billingüismu equilibráu, mesmu porcentaxe qu’hai 15 años, con un 28 por cientu que quier un usu sesgáu hacia’l predominiu del castellanu y un 10 por cientu del asturianu. Mentes, un 11 por cientu quier un monollingüismu asturianu.
  13. La mayoría, predispuesta a que los sos fíos deprendan asturiano: a un 51 por cientu gustaría-y, frente a un 19 que refuga esta posibilidá.
  14. Cambia la demanda sobre la presencia del asturianu nos medios impresos: ye d’un 45 por cientu, lo que supón un retrocesu de 11 puntos en comparanza con hai 15 años.
  15. Demanda d’una ufierta más variada na TPA: 4 de cada 10 siguen la programación n’asturianu. Un 58 por cientu considera que los programes n’asturianu deberíen tener una temática más amplia, con espacios informativos, deportes o magacines.
  16. La mayoría cuestiona les limitaciones de la política llingüística autonómica: el 64 por cientu considera que l’Alministración fai poco (27 por cientu), pueden facer más (23 por cientu) o nun faen nada (14 por cientu). Un 24 por cientu nun tien opinión, y un 12 por cientu confórmase colo qu’hai.
  17. Los asturianos siguen apostando pola normalización del asturianu: un 57 por cientu sigue apostando pol asturianu común o normalizáu, pero respetando a les variantes y l’artificialidá.
  18. La sociedá asturiana defiende un equilibriu ente lo que demanden de forma creciente polítiques más actives de recuperación llingüística y los que se conformen con que se satisfaga la voluntariedá: un 48 por cientu demanda polítiques más actives de recuperación llingüística, un 36 por cientu confórmase con que pueda deprendelu’l que quiera quiera, déxalu a la so propia inercia (12 por cientu) o abandonalu (1 por cientu).
  19. Apoyu casi unánime a la presencia del asturianu nes escueles: el 91 por cientu apóyalo, 3 puntos más qu’hai 15 años, yá sía como asignatura optativa (70 por cientu) o como una asignatura más (21 por cientu).
  20. Refuérciase la demanda del asturianu como llingua vehicular na enseñanza: al 52 por cientu gustaría-yos que l’asturianu fora vehicular, con más o menos intensidá, 4 puntos más qu’hai 15 años.
  21. Los asturianos siguen apostando mayoritariamente pola oficialidá del asturianu: el 53 por cientu quier la oficialidá, 7 puntos menos qu’hai 15 años que Llera Ramo rellaciona con “una resignación a dalgo que ven como imposible”. El 25 por cientu ye contrariu y el 20 por cientu, indiferente. L’electoráu de tolos partíos sofiten la oficialidá.
     

Encuesta 'Los mozos y la llingua asturiana'

El 23 d’ochobre del 2018 presentóse nel llar de l’Academia de la Llingua Asturiana l’avance del estudiu ‘Los jóvenes y la lengua asturiana’, fechu pola pedagoga, socióloga y tamién académica Isabel Hevia por encargu del Conseyu de la Mocedá del Principáu d’Asturies. Ésti dexaba datos destacaos, como que’l 86,1 por cientu ta a favor de la oficialidá, amosando asina que la mocedá ye favoratible a la equiparación de derechos de los falantes d’asturianu colos de castellanu. Nesta mesma cuestión, na encuesta más cercana, la fecha por Francisco José Llera Ramo nel 2017 (III Encuesta Sociollingüística d'Asturies) dirixida a persones adultes (mayores de 16 años), el resultáu yera del 53 por cientu.

 

La encuesta ellaboróse nel mes de setiembre ente 416 persones con edaes comprendíes ente los 16 y los 29 años de manera direuta na cai en 53 conceyos del país, distribuyíos en función de la proporcionalidá de la población. El 51,4 por cientu son homes y el 48.6 por cientu, muyeres, de los que’l 49,8 por cientu dieron clase de Llingua Asturiana na escuela.

 

Un 26,4 por cientu de los entrevistaos tienen ente 16 y 19 años; un 40,2 por cientu ente 20 y 24; y un 33,4 por cientu ente 25 y 29. La mayor parte son estudiantes (55,8 por cientu), mentes qu’un 26,2 por cientu trabayen y un 18 por cientu tán en paru.

 

El trabayu divídese en trés estayes: Identidá Llingüística, Usos de la Llingua Asturiana y Demandes Llingüístiques. Los datos más destacaos son los siguientes:

 

  1. Identidá Llinguística

 

-El 61,3 por cientu considera que n’Asturias esisten dos llingües propies: l’asturianu y el castellanu. El 22,1 por cientu cree que namái lo ye l’asturianu, por un 15,4 que reconoz sólo’l castellanu.

 

-El 93 por cientu diz que l’asturianu ye una llingua como’l restu de les del Estáu, magar nun sía oficial. El 94,2 considera que debería tar protexida al igual que les demás.

 

  1. Usos de la Llingua Asturiana

 

-La llingua asturiana ye emplegada polos mozos, en mayor o menor midida, conxuntamente col castellanu. El 49,5 por cientu usa’l castellanu, por un 42,5 por cientu que lo fai nes dos. Un 7,8 por cientu comunícase namái n’asturianu.

 

-El 94,2 entiende l’asturianu y un 85,3 por cientu manifiestó nun sentise nunca discriminizáu o ridiculizáu por usar l’idioma. El 14,8 por cientu qu’afirma que vivieron episiodios desagradables asitia éstos n’ámbitos formales como l’académicu por cuestiones como l’acentu o l’emplegu d’espresiones típiques asturianes.

 

-El 67,5 por cientu considera que l’asturianu ye una llingua útil tanto pal ámbitu familiar como social. Sicasí, a la hora de dirixise a otres persones en contestos públicos, el 73,8 por cientu emplega’l castellanu.

 

-Nel ámbitu de les redes sociales, el 33,9 por cientu fai un usu indistintu de dambes llingües. No que se refier a la llectura, el porcentaxe ye del 18,5.

 

  1. Demandes Llingüístiques

 

-El 77,2 por cientu ye favoratible a que l’asturianu sía llingua vehicular na escuela xunto col castellanu.

 

-El 80 por cientu considera que l’asturianu ha de tener una mayor presencia na RTPA. El 82 por cientu cree que los programes en llingua asturiana ha d’abarcar una temática mayor, como informativos o retresmisiones deportives.

 

-Una mui amplia mayoría de los mozos asturianos (86,1 por cientu) apoya  la demanda de la oficialidá del asturianu, mientres que los contrarios son un 12,2 por cientu.

 

Les conclusiones qu’afita l’estudiu son les siguientes:

 

  1. -En términos xenerales, les opiniones y valoraciones de la mocedá en rellación cola llingua asturiana son coherentes colos resultaos positivos aportaos pol conxuntu de la población nel ‘III Estudio Sociolingüístico de Asturias’ (2017), anque podríemos destacar qu’ente la xuventú les posiciones son muncho más  favoratibles a la utilización y caltenimientu del asturianu.
     
  2. -Del estudiu derívase la esistencia d’actitúes llingüístiques especialmente positives ente los más mozos con respeuto a les posibilidaes de futuru del asturianu, destacando una sensibilidá mayor hacia la dignificación social plena d’esta llingua, lo que nos lleva a afitar la esistencia d’un importante componente dinámicu favoratible a la llingua autóctona y a la so conservación.
     
  3. -Percíbese ente los mozos una influencia menor de la diglosia tradicional n’onde l’asturianu ocuparía la posición de variedá non prestixada. Por contra, dambes variedaes llingüístiques (castellanu y asturianu) son emplegaes polos xóvenes non sólo na esfera personal (llar, amistaes, rellaciones próximes…), sinón tamién n’otros contestos d’interaición más formales.
     
  4. -Paez evidente que los cambios actitudinales esperimentaos na sociedá asturiana a partir de l’aplicación de dalgunes tímides polítiques llingüístiques inciden de manera especialmente positiva a los estratos más mozos. La xuventú asturiana, n’efeuto, manifiesta una inequívoca posición afeutiva con respeuto al asturianu y les sos posibilidaes de dignificación y recuperación.

    Asina Hevia destaca que se pue “concluyir que la mocedá asturiana non sólo nun representa obstáculu nengún a la hora de plantegar una verdedera política de recuperación y normalización llingüística nel Principáu d’Asturies qu’iguale al asturianu a les demás llingües cooficiales del Estáu, sinón que, pol contrariu, constitúi un factor  de dinamización, de xustificación y hasta d’esixencia de tal política cultural”.

 

Estudiu 'Conocimientu del asturianu nos ámbitos urbanos: Uviéu, Xixón y Avilés'

El llar de l’Academia de la Llingua Asturiana foi tamién sede, el 28 de febreru del 2023, del avance d’un estudiu nuevu baxo’l títulu de ‘Conocimientu del asturianu nos ámbitos urbanos: Uviéu, Xixón y Avilés’, basáu na realización d’un esame d’asturianu a ciudadanos práuticamente idénticu al fechu pal primer estudiu sociollingüísticu del 1991 y una segunda parte suxetiva. Encargaríase del mesmu igualmente Francisco José Llera Ramo.

 

Fixéronse en total 500 entrevistes a domiciliu a mayores de 16 años ente’l 17 de xineru y el 11 de febreru d’esti mesmu añu, con representividá de tolos grupos d’edá y de xéneru. 192 realizáronse n’Uviéu, 240 en Xixón y 60 n’Avilés, con entrugues sobre fenómenos fónicos, fenómenos léxicos, y fenómenos morfolóxicos y sintácticos, que sirven pa conocer la maña llingüística del encuestáu, y aspeutos sociollingüísticos.

 

“La metá de la población metropolitana mayor de 16 años dívídese en partes cuasi iguales ente los que reflexen un nivel altu (22,6 por cientu) o suficiente (26,8 por cientu) de capacidá llingüística. Mentes que la otra metá dívidese ente los que tienen un compartamientu predominantemente diglósicu, un 31,2 por cientu, y los qu'amuesen un conocimientu nulu, deficiente, del 19,4 por cientu”, esplicó nel actu Llera Ramo, que consideró que “indiscustiblemente hai un avance oxetivu del asturianu na población” al comparalo col 1991, que se pue asitiar “ente'l 18 y el 20 por cientu”.

 

¿Les claves? “La escolarización”, pero tamién “el meyor tratu institucional, que tamién ayuda; la mayor presencia lliteraria; los avances culturales; la movilización coles oficines de normalización llingüística municipales en dalgunos llugares; y el movimientu ciudadanu”.

 

Los diferentes resultaos de la prueba de conocimientu d’asturianu y de les respuestes de la encuesta pueden consultase nel avance de resultaos espublizáu pola Academia de la Llingua Asturiana calcando nesti enllaz.

 

Conclusiones de la parte suxetiva:

 

-Más falantes y más alfabetizaos.

 

-Voluntá mayoritaria reforciada de reproducción interxeneracional.

 

-Sofitu cuasi unánime a la presencia del asturianu nes escueles.

 

-Consensu sobre la defensa del asturianu percima d’ideoloxíes.

 

-Demanda cuasi unánime d’un tratu institucional del asturianu igual al d’otres llingües rexonales.

 

-Apuesta cuasi unánime por un futuru billingüe p’Asturies.

 

Datos principales de la parte suxetiva:

 

Alfabetización I: el 37 por cientu diz qu'entiende y fala l'asturianu; el 29 namái lu entiende; el 16,4 entiende, fala y llee; el 13,2 entiende, fala, llee y escribe; y el 4,4 nin lu fala nin lu entiende. En total, el 66,6 por cientu declárase falante d'asturianu.

 

Alfabetización II: el 80 por cientu nunca tuvo escolarizáu n'asturianu, el 13,8 diolu na escuela y el 4,4 n'otru tipu de cursos, mentes qu'en un 1 por cientu nun sabe/nun contesta.

 

Reproducción interxeneracional: a un 63,2 por cientu prestaría-y ver que los sos fíos dominen l'asturianu, por un 18,4 al que nun-y gustaría, un 14,4 que respuende "depende" y un 4 por cientu que nun sabe/nun contesta.

 

Politización del asturianu: un 89,4 por cientu considera que "l'asturianu forma parte del patrimoniu cultural d'Asturies y debería tar al marxe d'ideoloxíes polítiques concretes", por un 6,2 que cree que "l'asturianu deféndese meyor cuando la defensa tien un calter políticu" y un 4,4 que nun sabe/nun contesta.

 

Tratu institucional: más del 70 por cientu demanda un tratu institucional igual o meyor que'l que reciben el restu de llingües del Estáu.

 

Futuru llingüísticu d'Asturies: el 95,8 por cientu quier un futuru billingüe p'Asturies (un 69,4 de manera voluntaria y un 26 de manera más intensiva).

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques