Espaciu y Tiempu de la Llingua Asturiana

Tas en Espaciu y Tiempu >Archivu Oral > Introducción

Introducción

L’Archivu Oral ye la seición de ‘Espaciu y Tiempu de la Llingua Asturiana’ dedicada a la fala. Nella ufrimos tanto un trabayu propiu, orixe d’esta seición, como l’accesu a los desendolcaos nestos años n’Asturies por otres entidaes. Una auténtica ayalga con grabaciones que son un testimoniu vivu de la realidá llingüística asturiana.
 

En primer lugar vas poder acceder a materiales procedentes de fontes mui diverses: dellos son frutu de trabayos de campu esclusivamente llingüísticos, otros de recopilaciones de material etnográficu o históricu. Toos ellos tán escoyíos col aquel de ser representativos de les variedaes dialeutales y de la situación sociollingüística del idioma, buscando siempre les situaciones cotidianes espontanes. Pola mor d'ello, la calidá de soníu nun ye siempre la más afayadiza, anque tratamos de ‘llimpiar’ les grabaciones no posible, pa facilitar la comprensión.
 

D’igual forma, facilitamos l’accesu al llabor fecha pol Grupu d’Investigación AMPER-Astur, perteneciente a la Universidá d’Uviéu y dirixíu por Carmen Muñiz Chacón. Ésti recueye grabaciones de frases en delles zones del país col oxetivu d’estudiar la entonación y l’acentu de los falantes. L’estudiu nun se centra namái nel asturianu, sinón que tamién lo fai nel gallego-asturianu y nel castellanu faláu nel país.
 

Tamién recoyemos el trabayu del Atlas Sonoru de la LLingua Asturiana, importante llabor investigativa entamada pola Rede de Museos Etnográficos d’Asturies dividida en cinco volumes. Nellos pues atopar testimonios orales cola sos correspondiente trescripción p’averase a la fala de cada zona.
 

Completa l’Archivu Oral la guía de pronunciaciones Forvo, ellaborada polos propios usuarios. En continuu crecimientu, permite l’accesu a la pronunciación de pallabres en cientos d’idiomes, ente ellos l’asturianu.

 

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques