Yá ye posible consultar l'almisión a la prueba del B2 d'asturianu

|
Cartelu Prueba de Certificación d'Asturianu B2

Les llistes tán disponibles nos centros d'inscripción, anque tamién se pue facer pela rede al traviés de la web Educastur.

L'alta demanda pa la prueba de nivel B2 de certificación d’asturianu adaptada al Marcu Común Européu de Referencia pa les Llingües, con cerca de 800 inscritros, obligó a la celebración d'un sortéu –dos primeres lletres del apellíu por 'xs' y en sentíu de la 'z' a la 'a'– pal repartu de places, al ser la llende máxima nesta primer convocatoria de 500. Ésta va celebrase del 21 al 29 de mayu en dos centros d'Uviéu, l'IES Aramo y la Facultá de Formación del Profesoráu y Educación de la Universidá d’Uviéu, nel campus de Llamaquique.

Les persones que se matricularen pueden conocer si van poder esaminase esti añu al traviés d'esti enllaz d'Educastur, pa lo qu'han d'introducir el so DNI y un códigu que recibieron previamente nel so dispostivu móvil, o de manera presencial nes llistes espuestes nos centros d'inscripción, nes que namái apaez dichu códigu por cuestión de proteición de datos. Dende mañana al 3 de marzu va abrise un plazu d'alegaciones, tando prevista la espublización de la llista definitiva'l 11 de marzu.

Semeya obra d'Inaciu Galán.

Contador Estadistiques