Educación saca la llista definitiva del B2 d'asturianu y abre'l periodu de pagu de tases

El costu del esame ye de 31,63 euros, siendo'l periodu d'abonu y entrega del xustificante nos centros d'inscripción ente los díes 12 y 23.

La Conseyería d'Educación asoleyó güei la llista definitiva d'almitíos a la prueba de nivel B2 de certificación d’asturianu adaptada al Marcu Común Européu de Referencia pa les Llingües, que sufre pocos cambios y pue consultase na web d'Educastur o nos cuatro institutos habilitaos pa la matrícula. Dende mañana les 500 persones con plaza de los casi 800 solicitantes tienen pa pagar les tases na web de los Servicios Tributarios del país o nes siguientes entidaes bancaries collaboradores: Caja Rural de Asturias, Liberbank, BBVA, Santander, Herrero-Sabadell y La Caixa.

Pa ello ha de rellenase'l modelu 046 y abonar 31,63 euros, a esceición de los que tengan descuentu por familia numberosa o exención de pagu por delles circunstancies. El xustificante del pagu ha de llevase darréu a los centros d'inscripción pa finar el trámite, con plazu máximu hasta'l día 23, lllunes.

La espublización de la llista provisional d'inscritos va tener llugar el día 31, abriéndose darréu un plazu d'alegaciones. L'esame va celebrase del 21 al 29 de mayu en dos centros d'Uviéu, l'IES Aramo y la Facultá de Formación del Profesoráu y Educación de la Universidá d’Uviéu, nel campus de Llamaquique, tendiendo qu'acudir cada persona en dos ocasiones a facer la prueba, una'l vienres 29 p'afrontar los exercicios del segundu bloque.

Na semeya, niveles qu'afita'l Marcu Común Européu de Referencia pa les Llingües, de les que l'asturianu nun va contar con C2 de momento.