La prueba de certificación d’asturianu de nivel B2 va celebrase en mayu

|
Carmen Suárez, Adrián Barbón y Paula García na entrega de los Premios Estraordinarios d'Educación

Yá hai feches pa la primer prueba de certificación d’asturianu adaptada al Marcu Común Européu de Referencia pa les Llingües, que nesti añu namái se va convocar d’un de los cinco niveles afitaos, l’intermediu B-2. Va celebrase en mayu, del 21 al 29 en dos centros d'Uviéu, abriéndose la inscripción esti mesmu xueves.

Paula García Martínez, direutora xeneral d’Ordenación, Evaluación y Equidá Educativa, firmó ayeri la resolución, pendiente entovía d’espublización nel BOPA, pola que se convoca la “prueba de certificación del nivel competencial Intermediu B2 de llingua asturiana del añu 2020”. Ye la primer prueba de conocimientu del idioma adaptáu al marcu européu que se va entamar, única esti cursu, depués de que la conseyería afitara l’añu pasáu los cinco niveles de competencia nel usu de la llingua asturiana, esto ye, el básicu A1, el básicu A2, l’intermediu B1, l’intermediu B2 y l’avanzáu C1, y regulara les pruebes de certificación correspondientes.

Les persones que quieran obtener esti títulu oficial que-yos acreite la so competencia en llingua asturiana han de movese rápido, yá que’l periodu pa inscribise va abrise’l xueves y va caltenese namái 8 díes, hasta’l vienres 14. Va poder facese’l trámite n’Uviéu (IES Aramu), Xixón (IES Calderón de la Barca), Avilés (IES Carreño Miranda) y Mieres (IES Bernaldo Quirós), anque les pruebes namái van facese nel centru uvieín y na Facultá de Formación del Profesoráu y Educación de la Universidá d’Uviéu, nel campus de Llamaquique.

El día 27 espublizaránse les llistes provisionales d’almitíos, con un tope de 500 places. El plazu de pagu de les tases abriráse el 12 de marzu, con fecha llende’l 23 d’esi mesmu mes.

Dos bloques

L’esame dividiráse en dos bloques. El primeru va celebrase en dellos díes n’horariu vespertín, de 16 a 20.10 hores, ente’l 21 y el 29 de mayu, y va consistir na producción y coproducción de testos escritos, comprensión de testos orales y comprensión de testos escritos que cada alumnu va facer nuna mesma xornada.

Mentes, los exercicios del segundu bloque van entamase nun mesmu día, el vienres 29 de mayu. Éstos van centrase na producción y coproducción de testos orales y na mediación, na que l’esamináu fai d’intermediariu ente dos interlocutores que nun son quien a entendese de manera direuta.

Na semeya, García Martínez, a la izquierda del presidente d'Asturies, Adrián Barbón, na entrega de los Premios Estraordinarios d'Educación el xueves pasáu.

Contador Estadistiques