Xarrio rexistra un casu nuevu de coronavirus

La paciente, n'estáu estable, ye una muyer de 52 años que ta siendo valorada n'Avilés.

L'Hospital de Xarrio, el que da serviciu al occidente del país, rexistró'l segundu positivu de COVID-19 esti mes después del anunciáu'l día 2 d'una asturiana residente en Ribadeo. Esta rexón, que llenda con A Mariña, zona gallega que ta viviendo un biltu con cuasi dos centenares d'afeutaos pol coronavirus SARS-CoV-2, ye una zona delicada dada la situación nel país vecín.

El Llaboratorio de Viroloxía del HUCA confirmó esta madrugada, con prueba PCR tomada nel Hospital de Xarrio, el positivu d'esta muyer, que presentaba síntomes compatibles cola COVID-19. Darréu, foi treslladada al Hospital San Agustín d'Avilés, onde ta ta siendo valorada mientres el Serviciu de Vixilancia Epidemiolóxica ta col estudiu de los contautos estrechos de la contaxada.

Ésti ye'l segundu positivu que suma Asturies, el terceru teniendo en cuenta'l de Ribadeo, que finalmente contabiliza de manera oficial Galicia, tres trés selmanes ensin casos nel país. L'otru afeutáu ye un mozu que tuvo contauto col coronavirus SARS-CoV-2, previsiblemente en Catalunya, con síntomes confirmaes por PCR tres tornar en coche particular en Barcelona y ensin contautos estrechos con otres persones tres la so vuelta a Uviéu.