Un casu importáu de Catalunya fraya la serie de trés selmanes ensin contaxos n’Asturies

Depués de trés selmanes ensin contaxos, yá que’l que se detectó por PCR nel Hospital de Xarrio finalmente contabilizó en Galicia al residir l’asturiana afeutada en Ribadeo, Asturies cuenta con un positivu de COVID-19. Según la información facilitada pola Conseyería de Salú, trataríase d’un casu importáu de Catalunya.

El Llaboratoriu de Viroloxía del Hospital Universitariu Central d’Asturies (HUCA) confirmó esta mañana’l positivu d’un home que presentaba síntomes compatibles cola enfermedá cuasada pol coronavirus SARS-CoV-2. El Serviciu de Vixilancia Epidemiolóxica entamó darréu l’estudiu de contautos de la persona afeutada.

Dende’l 15 de xunu la conseyería nun informaba de positivos por COVID-19 n’Asturies, polo que s’acumulaben 20 xornaes ensin contaxos nel país –25 según les cifres facilitaes pol Ministeriu de Sanidá–. Anque la confirmación se fixo esta mañana, Salú incopora’l casu a les datos d’ayeri, nos que se rexistra una persona menos na UCI pa dir a planta y dexar el total en 3, y una curación, polo que’l númberu de persones con alta epidemiolóxica queda en 2.062.