Salú pasa a comunicar los datos de la COVID-19 de llunes a vienres

Esta fin de selmana nun se rexistraron positivos nuevos magar el casu de Xarrio.

La Conseyería de Salú comunicó esta mañana que los datos diarios de la COVID-19, que vien dando dende l'entamu del andanciu n'Asturies, va comunicalos agora de llunes a vienres. Asina, na información que da los llunes va incluyir la del vienres, el sábadu y el domingu.

Nes trés xornaes últimes nun hebo casos de la enfermedá causada pol coronavirus SARS-CoV-2 magar el positivu del xueves, dao a conocer el vienres, d'una muyer de 52 años nel Hospital de Xarrio. Finalmente'l so orixe nun ta nel brotu d'A Mariña, como se podía pensar al facer frontera esta zona de Galicia con Asturies, sinón que ye importáu de la República Dominicana.

D'esti país, d'onde ye orixinaria, tornó'l martes tres visitar a la so familia. L'afeutada desplazóse a Ḷḷuarca, onde reside, en coche dende Madrid, onde aterrizó'l so vuelu'l martes, sintiéndose mal na nueche del miércoles.

Tres dar positivu, el Sistema de Vixilancia de Contautos Estrechos entamó a facer el siguimientu a cuatro persones coles que tuvo rellación, dando toos negativu nes pruebes.

Ensin cambios na serie

Con respueto a los datos de los trés díes últimos, nun hebo cambios con respeuto al xueves. La serie sigue con 2.437 casos detectaos, 2.078 curaciones y 339 muertes.

Mentes, na UCI permanecen ingresaes 3 persones y en planta, 1.