Xaime Martínez, Lafu y Rebeca, Los Berrones y El Trasno, finalistes del XI Premiu al Meyor Cantar

El Teatru Nuevu de La Felguera va acoyer el día 26 la gala del XI Premiu al Meyor Cantar, qu’escueye’l meyor tema n’asturianu y gallego-asturiano del 2017 y 2018. Xaime Martínez, Lafu y Rebeca, Los Berrones y El Trasno, ganador nel 2014, son los cuatro finalistes.

L’autor del discu-llibru ‘Ósculos d’agua nel Imperiu Asturianu’ –editáu por Araz, empresa editora tamién d’Asturies.com–, ún de los trabayos meyor valoraos de tolos asoleyaos n’Asturies nel 2018, va competir con ‘Discursu de Belarmino Tomás ente los soldaos mentes camina sobre les agües del ríu Nalón’. Martínez encargóse tanto de la música como la lletra de la pieza finalista.

Lafu y Rebeca presenten ‘Les sombres sobre la yerba’, composición del propiu Alejandro Lafuente, y el popular grupu Los Berrones ‘¿Esto pa qué val?’, con lletra de Ramón Blanco y música d’Olegario Méndez. Completen los finalistes la Banda Gaitas El Trasno con ‘Oldenburg’, creada por Kike Dembinsky.

La formación de Cuaña yá sabe lo que ye ganar esti gallardón, en concreto la octava edición –correspodiente al meyor cantar del 2013–, con ‘Volviche’, primer tema en gallego-asturiano que lu llevó. Inclusive lu defendieron nel Liet International, festival européu de canciones en llingües minorizaes que se celebró na población baxa-saxona que da nome al tema col que ye finalista esti añu.

Naquella ocasión la participación nesti certame nun taba incluyíu nel premiu, polo que la banda tuvo que pagase’l viaxe col sofitu únicu del Conceyo de Cuaña. Esta edición per primer vegada’l Premiu al Meyor Cantar va contar con una recompensa económica, que va ser de 6.000 euros.

Actuación de Luis Núñez y los Folgazanes

Na gala de La Felguera, na primer xornada de la XL Selmana de les Lletres Asturianes, dedicada a la música n’asturianu, los cuatro finalistes van defender en direuto los sos cantares. Mientres el xuráu especializáu escueye’l ganador, Luis Nuñez y los Folgazanes, que nel 2017 llevaron con ‘La ñeve y la esmeralda’ el Premiu al Meyor Cantar del 2015 y 2016, van intrepretar dellos temes.

Esti gallardón convócalu’l Gobiernu “col oxetivu de consolidar, prestixar y arriquecer la creación musical tanto n’asturianu como en gallego-asturianu”. Por ello, la gala va ser emitida per TPA.

Na imaxe, El Trasno na gala del 2014.