‘Volviche’, d'El Trasno, lleva’l VIII Premiu al Meyor Cantar

|

Una selmana depúes d’algamar el Premiu AMAS al meyor cantar folk, ‘Volviche’ repite gallardón, nesta ocasión el VIII Premiu al Meyor Cantar. La Banda Gaitas El Trasno, de Cuaña, ye la intérprete d’esti tema en gallego-asturiano.

‘Volviche’, con lletra de Xosé Miguel Suárez Fernández ‘Tapia’ y voz del cantante del grupu xixonés Maurizios, Kike Dembinsky, convenció al xuráu del gallardón que premia al meyor cantar del añu 2013. Incluyíu nel primer álbum d’estudiu d’El Trasno, de nome ‘Axeitín’, trátase d’un de los dos temes cantaos del discu, que lleva nel mercáu trés meses. La banda cuañesa creóse nel 1999 na Escuela de Música Tradicional de Cuaña y ta dirixida por Javier Tejedor. Como premiu, algamaron una escultura, amás del derechu a recibir a lo llargo del añu promoción dende’l Gobiernu al traviés de los medios de comunicación, asina como a participar en dellos eventos entamaos pola Alministración

Na gala d’ayeri nel Teatru de la Llaboral, presentada por Sonia Fildalgo y Naciu Varillas, tamién participaron Rafa Lorenzo, con ‘Ente mazanos’; Vrienden, con ‘Vivu en dalgún llugar’; y Silvia Quesada, con ‘La pena abierta’. Pela so parte, Taranus, ganador del VII Premiu al Meyor Cantar con ‘Ensin ti’, actuó nel tiempu nel que’l xuráu tomaba una decisión.

Pa sentir el cantar ganador, asina como’l del restu de finalistes del VIII Premiu al Meyor, ha de calcar nesti enllaz.

 

Contador Estadistiques