El XI Premiu al Meyor Cantar va tener un recompensa de 6.000 euros

|
Premiu al Meyor Cantar

La Conseyería d’Educación y Cultura ta acabante de convocar el XI Premiu al Meyor Cantar, que va escoyer el meyor tema n’asturianu y gallego-asturiano del 2017 y 2018. Como novedá, esta edición va contar con una recompensa económica, que se cifra en 6.000 euros.

Depués de que nel 2018 nun s’entamara esti gallardón, la conseyería torna a recuperar el modelu emplegáu nel 2016, cuando se premió al meyor cantar de los dos años anteriores. Dende’l 2007, cuando se creó, hasta’l 2014, siempre tuvo caráuter añal.

Pa la undécima edición, poro, van valorase los temes correspondientes al 2017 y al 2018. Van poder presentase aquelles composiciones orixinales, o con lletra nueva sobre melodía esistente, qu’empleguen l’asturianu o’l gallego-asturiano.

Como novedá, el Premiu al Meyor Cantar va entregar una recompensa económica al ganador de la gala que se va celebrar nos meses próximos, na que van defendese en direuto los temes de los artistes o grupos que pasen el corte. L’escoyíu pol xuráu va recibir un total de 6.000 euros.

L'últimu vencedor foi Luis Núñez y Los Folgazanes gracies a la so creación 'La ñeve y la esmeralda', meyor tema del 2016.

Contador Estadistiques