“‘Voces’ cuenta la historia social y cultural d’Asturies dende la perspeutiva de la llingua’, esplica Viejo

Esti miércoles inaugúrase nel Muséu Arqueolóxicu d’Asturies la esperada esposición ‘Voces. La llingua n’Asturies al traviés de los sieglos’. El profesor universitariu Xulio Viejo encargóse de coordinala y defínela como una muestra que “cuenta la historia social y cultural d’Asturies dende la perspeutiva de la llingua”.

Al traviés de paneles triangulares y audiovisuales los visitantes van poder percorrer “la historia social del llinguaxe d’Asturies dende la prehistoria a l’actualidá” focalizada nel asturianu. La intención del equipu de la Universidá d’Uviéu, institución a la que-y encargó la Conseyería d’Educación y Cultura la ellaboración de la muestra pa incorporala al programa ‘Cuadonga Centenarios’, ye que ‘Voces’ tuviera “un enfoque diferente, marcadamente humanista”; qu’abriera un alderique sobre “qué facemos cola diversidá llingüística nun momentu de cambiu, de globalización”.

Esta reflexón xeneral sobre’l llinguaxe, de la que Viejo, Ramón d’Andrés y Roberto González-Quevedo s’ocuparon de la parte académica, comienza nos oríxenes del llinguaxe, pa depués facer referencia a les llingües prerromanes, la romanización, la fase medieval, la castellanización y la situación moderna, parando es secu na Transición y l’autonomía. Nesti puntu últimu, la amuesa nun cai en personalismos, centrándose nes producciones culturales: cine, lliteratura, música…

“Una persona que visite la esposición, l’espectador mediu, pue deprender muncho cola esposición. L’espectador avezáu, que cuenta con cierta idea sobre la temática, tamién va descubrir coses nueves”, apunta Viejo, que va tar na inauguración programada mañana a les 17 hores xunto con Genaro Alonso, conseyeru d’Educación y Cultura, y Juan Hernaz, diseñador de la muestra. Ésta va poder visitase nel Arqueolóxicu, muséu uvieín que cuenta con entrada de baldre, hasta’l 14 d’ochobre.

La intención de la conseyería ye llevar l’amuesa a otros puntos del país nel futuru, polo que s’apostó por un formatu portable. “‘Voces’ pue adaptase tanto a espacios espositivos amplios como aquellos más reducíos que pue haber en conceyos pequeños”, esplica Viejo.

Na imaxe, cartelu que los visitantes van atopar na entrada de la esposición.