L’asturianu incorpórase a los centenarios de Cuadonga con una esposición nel Arqueolóxicu sobre la historia del idioma

|
L’asturianu incorpórase a los centenarios de Cuadonga con una esposición nel Arqueolóxicu sobre la historia del idioma

El miércoles va abrir les sos puertes ‘Voces. La llingua n’Asturies al traviés de los sieglos’, una esposición entamada pola Conseyería d'Educación y Cultura sobre la historia del asturianu que va acoyer hasta'l 14 d'ochobre'l Muséu Arqueolóxicu d'Asturies. Ésta ta enmarcada dientro del programa ‘Cuadonga Centenarios’.

Xulio Viejo ye’l coordinadora de la muestra, na que participaron un piñu de profesores de la Universidá d’Uviéu. Compuesta por paneles, nos que destaquen los elementos gráficos, y audiovisuales, repasa la rellación del asturianu coles llingües indoeuropees y romániques, l’apaición de los primeros documentos nos que se menta l’asturianu como llingua oral tradicional y propia de la xente d’esti territoriu, los primeros documentos n’asturianu, el desenvolvimientu de la so lliteratura, la minorización o los movimientos sociales pa la so recuperación y revitalización.

L’oxetivu de ‘Voces. La llingua n’Asturies al traviés de los sieglos’, que va poder visitase dende’l miércoles hasta’l 14 d’ochobre, ye sacar a la lluz la trayeutoria, interesante y llarga, d’una llingua milenaria percorriendo les sos distintes etapes y analizando les cuestiones qu’en cada sector marcaron el so pasáu y presente y proyeuten el so futuru nel sieglu XXI. La Conseyería d’Educación y Cultura inclúi esta actividá nel programa d’actividaes del triple centenariu de Cuadonga que se celebra esti añu: 1.300 años del orixe del Reinu d'Asturies, y 100 años de la coronación canónica de la Santina y de la creación del Parque Nacional de la Montaña de Covadonga, anguaño de Picos de Europa.

Los conteníos de l’amuesa van tar accesibles, amás de n’asturianu, en castellanu y inglés pente medies de códigos QR, asina como’l catálogu xeneral de la esposición. La so visita, al igual que’l muséu, ye de baldre.

Contador Estadistiques