Villaverde abraza’l manual d’identidá corporativa pa desaniciar el logu trillingüe de la Universidá d’Uviéu

|
Ignacio Villaverde y Mariví Monteserín

El rector nuevu de la Universidá d’Uviéu, Ignacio Villaverde, xustifica la decisión de desaniciar el logu trillingüe de la institución en qu’ésti nun ta recoyíu nel manual d’identidá corporativa, que data del 2013. Afala a llevar l’asuntu al Conseyu de Gobiernu pa decidir que la universidá asturiana emplegue l’asturianu na so imaxe.

En declaraciones recoyíes por Europa Press, tres aconceyar ayeri cola alcaldesa d’Avilés, Mariví Monteserín, el caderalgu de Derechu Constitucional argumentó esta circunstancia pa esplicar la desapaición progresiva del logu adoptáu pol rector anterior, Santiago García Granda. Ésti presentaba xunto col escudu de la Universidá d’Uviéu el so nome en castellanu, n’asturianu y inglés, pero nes selmanes últimes sustituyóse en comunicaciones y documentos por ún monollingüe en castellanu, fechu del que se fixo ecu’l llunes Asturies.com.

“Ye'l que tien que rexir los criterios”, apuntó en referencia al manual d’identidá corporativa, del 2013. Nesi sen, apuntó que si daquién quier llevar esti asuntu al Conseyu de Gobiernu nun va tener problema n’aldericalo.

Reaiciones de refugu a la decisión

Al conocer esta decisión del nuevu equipu reutoral foron munches les reaiciones de refugu. Iniciativa pol Asturianu faló de “un pasu atrás pergrave pol que yá pidimos esplicaciones”.

Na imaxe, Villaverde y Monteserín. Semeya de la Universidá d'Uviéu.

Contador Estadistiques