Pasu atrás nel usu del asturianu na Universidá d’Uviéu: la institución dexa d’emplegar el logu trillingüe

Ún de los primeros cambios cola llegada d’Ignacio Villaverde al Rectoráu ye la desapaición progresiva del logu trillingüe de la Universidá d’Uviéu. En dellos documentos y correos electrónicos de la institución universitaria namái apaez yá'l nome ‘Universidad de Oviedo’, desaniciando del mesmu tanto al asturianu como al inglés.

Con Santiago García Granda como rector, periodu nel que s’avanzó pasu ente pasu na normalización llingüística, la Universidá d’Uviéu adoptó un logu trillingüe, incorporando l’asturianu y l’inglés xunto al castellanu. Una midida que nun xeneró crítica nenguna, amosando con ello un compromisu pa colo propio xunto con una visión internacional de la institución.

La victoria nes urnes de Villaverde ta provocando dellos cambios na universidá asturiana y ún d’ellos ye una vuelta al pasáu al recuperar un logu monollingüe. La Oficina de Comunicación de la Universidá d'Uvéu emplegó’l trillingüe hasta’l día 15, momentu nel qu’ésti se camudó pa usar namái el castellanu.

El Vicerrectoráu d’Estudiantes siguió utilizándolu en díes posteriores, anque too paez indicar que'l logu va dir desapaeciendo progresivamente nes comunicaciones y documentación de toles estayes de la Universidá d’Uviéu, lo que ye un retrocesu claru nel usu, normalización y visibilización del asturianu na institución universitaria.