Villaverde considera l'usu del asturianu pola Universidá d'Uviéu "una posición ideolóxica"

|
Andrés Fernández intervención Claustru Universidá d'Uviéu

La Xunta Asturiana d’Estudiantes fixo una defensa, al traviés del so representante Andrés Fernández, del patrimoniu llingüísticu nel Claustru de la Universidá d’Uviéu, onde entrugó pol desaniciu del logu trillingüe. Na respuesta'l rector Ignacio Villaverde reafirmó l’usu del castellanu como única llingua alministrativa al ser la única oficial y consideró "adoptar una posición ideolóxica" l'usu del asturianu por parte de la institución.

La entruga fecha'l vienres por Fernández, "respetuosa n'estremu", centrábase en que “por qué se fixo’l cambiu de denominación trillingüe a monollingüe de la universidá”, una forma en castellanu, asturianu y inglés “qu’esti coleutivu estudiantil consideraba “lóxica porque representa les trés realidaes de la Universidá d’Uviéu”. Nesi sen, defendió que “modificar la normativa p’afayar esa denominación trillingüe” sería la decisión más acertada p’aforrar costos y esfuercios.

“La razón del cambiu ye que la llingua asturiana nun ye cooficial na comunidá autonóma y polo tanto nun la podemos utilizar como llingua alministrativa. El nuesu Reglamentu d’Identidá Corporativa tampoco nun lo contemplaba; tampoco nun podemos facer una modificación de la normativa que convierta al asturianu o a cualquier otra llingua distinta al español n’otra llingua formal o materialmente cooficial porque taríamos infrixendo la propia normativa tanto estatal como autonómica”, respondió Ignacio Villaverde. Darréu dixo cumplir cola Llei d’Usu y Promoción del Bable/Asturianu y refirióse al idioma como “un gran patrimoniu cultural d’Asturies”.

“L’equipu rectoral nun pue adoptar una posición ideolóxica porque creo que lo que nos cumple ye respetar l’Estatutu d’Autonomía y la Constitución”, añadió Villaverde. Más alantre, a una intervención de Javier Suárez Parrondo que defendió la normalización llingüística –apuntó que “ye necesaria, pero tenemos que tener presente que n’Asturies tenemos dos llingües y si pretendemos facer una normalización o van les dos xuntes o meyor que nun vaya nenguna”–, insistió en que “fadremos lo que la llei nos diga”.

Fernández, en declaraciones a Asturies.com, rescampló’l tonu cordial y respetuosu emplegáu pol rector énte una entruga cola que nun pretendía polemizar, anque aseguró nun compartir la postura de Villaverde al entender que la Llei d’Usu sí ampara l’usu del asturianu por parte de la institución universitaria. Respeuto al emplegu del idioma na universidá ve "un retrocesu, ta descuidándose un poco más”, señalando que “el mínor ta tapecíu” y que, al igual que treslladó na so intervención énte'l Claustru, hai fallos de traducción na páxina web.

“Nun ye como va bastante años, 20 atrás, agora pueden presentase tesis n’asturianu, como amosaron recién persones como Inaciu Galán, pero queda camín por andar”, añadió’l representante estudiantil, que tamién, al igual que Suárez Parrondo, defendió’l mesmu tratu pal eonaviego que pal asturianu. Otra manera, dende la Xunta Asturiana d'Estudiantes aseguróse que la respuesta dada por Villaverde nel Claustru "evidencia la necesidá inmediata d'algamar la oficialidá" como "únicu marcu que pue permitimos llegar a la normalización".

Na imaxe, un momento de la intervención de Fernández con Villaverde, segundu pela derecha, poniendo atención.

Contador Estadistiques