Va prorrogase otros 14 díes el pieslle del ociu nocherniegu

|
Pablo Ignacio Fernández Muñiz Comisión de Salú segunda prórroga pieslle ociu nocherniegu

La prohibición va allargase hasta'l 23 d'agostu magar la baxada de la incidencia. Esti miércoles rexistráronse 229 casos nuevos de COVID-19.

Dende'l 13 de xunetu los chigres d'ociu nocherniegu nun pueden abrir los sos interiores, midida prorrogada llueu hasta'l llunes vinientes y que se torna a allargar agora. Van siguir tamién ensin poder vender alcohol de 22 a 6 hores los comercios y gasolineres.

Esta anuncia diola esta mañana'l conseyeru Pablo Ignacio Muñiz Fernández na Comisión de Salú, argumentando que "debemos ser prudentes", y nun tardaron en llegar les quexes del sector de chigres de nueche pola imposibilidá de trabayar n'agostu, el mes con más movimientu del branu. Anguaño la incidencia acumulada a 14 díes ye, con datos del martes, de 435,72 casos cada 100.000 habitantes –l'actualización rebaxóla ayeri a 417,66–, una cantidá alta anque la tendencia ye descendente; nel momentu nel qu'entró a valir la midida, el 13 de xunetu, taba en 527,1, y cuando s'activó la primer prórroga, el 27 de xunetu, en 600,03.

Dos finaos

A falta de la espublización de los datos oficiales de la COVID-19, la Conseyería de Salú comunicó la detección ayeri de 229 casos nuevos –l'actualización aumenta la cifra en 2 por casos non contabilizaos la xornada previa–. Son 28 casos más que'l martes, cuando s'informó de 201, con una tasa de positividá tamién mayor, del 9,66 por cientu con 3.042 pruebes de diagnósticu d'infeición activa feches pol 9.30 por cientu del día anterior.

A 7 díes esti porcentaxe yera enantes de l'actualización del 11,11 por cientu –ayeri baxó al 10,52 por cientu–, en tendencia tamién descendente. La Organización Mundial de la Salú (OMS) marca'l 5 por cientu como referencia a partir de la que s'empieza a perder el control de la pandemia.

La consecuencia más negativa de la cuarta fola ye l'aumentu de les muertes. Esta selmana yá van 7, sumando les 2 d'ayeri, una muyer de 89 años y un home de 84, que ponen el total del andanciu en 2.013.

Hai 132 pacientes hospitalizaos con confirmación o sospecha de COVID-19, 13 menos que'l martes. A ellos hai que sumar 34 ingresaos na UCI, 1 más que la xornada anterior.

22 biltos activos

Asturies informó al Ministeriu de Sanidá de la esistencia de 22 biltos activos, 2 más que la selmana pasada, con un total de 283 casos. 6 brotos detectáronse estos 7 díes últimos, comunica la conseyería.

Contador Estadistiques