La metá de los trentañeros yá tienen la pauta completa

Un 67,39 por cientu de la población del país ta inmunizao. Esti martes rexistráronse 201 casos, con una tasa de positividá del 9,30 por cientu.

57.788 persones naciós ente'l 1982 y el 1991 yá cuenten cola pauta completa de la vacuna contra la COVID-19. Ye un 50,49 por cientu de los ciudadanos del tramu d'edá ente los 30 y 39 años, mentes qu'un 73,02 por cientu cuenta cola primer dosis.

Estos datos confirmen l'avance de la campaña de vacunación, agora destinada a mayores de 12 años. Del siguiente grupo nel que ta enfotada l'alminsitración del preparáu, los ventiañeros, el 61,88 por cientu, 48.957 persones, yá cuenta cola primera inyeición.

Mentes, nes cifres globales, 686.569 asturianes y asturianes tienen la pauta completa, un 67,39 por cientu de la población total del país y un 73,51 por cientu de la población diana. Con una dosis hai 785.364, un 77,09 y un 84,04 por cientu, de manera respeutiva.

Trés finaos

A falta de la espublización de los datos oficiales de la COVID-19, la Conseyería de Salú informó de la detección ayeri de 201 casos nuevos –l'actualización aumenta'l total a 205 por casos non contabilizaos en díes anteriores–. Son 3 más que'l llunes, con una tasa de positividá del 9,30 por cientu con 3.354 pruebes de diagnósticu d'infeición activa feches, dalgo superior a la de la xornada anterior, cuando quedó nun 8,80 por cientu.

Esti porcentaxe a 7 díes, en tendencia descendente, yera enantes de l'actualización del 11,91 por cientu –ayeri baxó al 11,11 por cientu–. La Organización Mundial de la Salú (OMS) marca'l 5 por cientu como referencia a partir de la que s'empieza a perder el control de la pandemia.

Hai que llamentar la muerte na xornada dos muyeres de 91 y 86 años y d'un home de 72. Dende qu'entamó l'andanciu perdieron la vida cola enfermedá causada pol coronavirus SARS-CoV-2 2.010 persones –l'actualización suma 1 fináu más non contabilizáu–.

145 pacientes tán hospitalizaos con confirmación o sospecha de COVID-19, 10 menos que'l llunes. La ocupación de la UCI sigue na mesma cifra: 33 ingresaos.

Na semeya, vacunación en L'Entregu de moces y mozos de 15 a 23 años, amás de la repesca de mayores de 60.