El Gobiernu confirma un aforu del 40 por cientu en competiciones deportives n'espacios abiertos

N'interior queda nun 30 por cientu. Esti xueves rexistráronse 175 casos nuevos de COVID-19.

El Gobiernu decidió adoptar el máximu porcentaxe d'aforu pa les competiciones deportives que se pautó nel Conseyu Interterritorial del Sistema Nacional de Salud del miércoles. Asina, los clubes van poder abrir les sos instalaciones al 40 por cientu de la capacidá nel casu de los deportes al aire llibre y del 30 nel casu de les celebraes baxu techu.

Va ser obligatorio caltener 1,5 metros de distancia interpersonal ente espectadores, sacantes convivientes. Al igual que la temporada pasada en categoríes non profesionales, hai que llevar la mázcara en tou momentu y nun se permite comer, fumar nin beber a lo llargu del partíu o de la competición.

Estes midíes van tar vixentes del 13 al 29 d'esti mes, momentu nel que se revisarán d'alcuerdu a la situación de la pandemia.

2 finaos

A falta de la espublización de los datos oficiales de la COVID-19, la Conseyería de Salú informó de la detección de 175 casos nuevos ayeri –l'actualización reduzlo en 3 por duplicaos en díes anteriores–. Son 54 menos que'l miércoles, cuando se comunicaron 229, con una tasa de positividá asemeyada, un 9,40 por cientu por un 9,66, de manera respeutiva.

Fixéronse na xornada un total de 2.658 pruebes de diagnósticu d'infeición activa. A 7 díes el porcentaxe de positividá yera enantes de l'actualización del 10,52 por cientu –ayeri baxó al 10,02 por cientu–.

Finaron una muyer de 86 años y un home de 77 cola enfermedá causada pol coronavirus SARS-CoV-2, polo qu'aumenten el total de muertes nel andanciu a 2.015. Mentes, hai 118 pacientes hospitalizados con confirmación o sospecha de COVID-19, 14 menos que'l xueves, y otros 35 na UCI, 1 más.

Na semeya, El Molinón nun momentu del partíu ente'l Sporting y la UD Almería (0-2), únicu de la Lliga disputáu con públicu n'Asturies la temporada pasada, nel que se permitió l'asistencia de 5.000 espectadores con distancia ente asientos.