La Feria del Llibru y Discu n'Asturianu treslládase a Uviéu

Va tener como sede la plaza de Trascorrales, con numberoses actividaes programaes.

La inauguración de la VII Feria del Llibru y Discu n'Asturianu, que dexa Avilés pa celebrase n'Uviéu, va ser mañana al meudía, pa siguir con una mesa redonda entitulada 'Música n'asturianu', moderada por Ignaciu Llope. Los participantes van ser Xune Elipe, Llorián García Flórez, Ismael González Arias, Andrea Joglar y Xosé Anton Fernández 'Ambás'.

Una actuación de Pop Piquiñín va tener llugar a les 13, pa siguir pela tarde coles presentaciones de 'Allumamientu' de Pablo Texón (17 hores), obra ganadora del XXIV Premiu Xuan María Acebal de Poesía, cola presencia de Lurdes Álvarez; y 'El visitante impropiu' de Manuel García Menéndez, que llevó'l XXXIX Premiu Xosefa Xovellanos de novela, actu nel que va conducir Pablo Antón Marín Estrada. Un taller infantil de xuegos tradicionales, a cargu de Trebeyos (18 hores); la presentación del llibru 'Mecanoscritu del segundu orixe' torna de Ramón d'Andrés del testu de Manuel de Pedrolo (19 hores), a cargu de Severino Antuña; y un conciertu de Xaime Martínez (20 hores) completen les actividaes de la primer xornada.

El domingu, a les 11.30 hores, va presentase la revista 'Cultures' de l'Academia de la Llingua Asturiana, con Roberto González-Quevedo como conductor y l'asistencia del presidente la institución académica, Xosé Antón González Riaño, y Ignacio Llope. Trebeyos va repetir con un taller a les 12.30 hore y, yá de tarde, Olga Cuervo va poner un cuentacuentos (17 hores) y Alerto Vázquez García va presentar 'Los llazos coloraos', obra ganadora del IX Premiu Alfonso Iglesias de cómic, xunto con Esther Prieto.

L'horariu de la feria va ser de 12 a 22 hores, el sábadu, y de 11 a 19 hores, el domingu. Con cada merca, el veceru va recibir el doble CD ‘40 años al son de la nuestra música/40 anos al son da nosa música’ conmemorativu de la XL Selmana de les Lletres Asturianes.