Una novela francesa sobre'l 34 llega a Asturies 88 años depués

La coleición 'Calume' de Trabe recupera un títulu del escritor gascón Joseph Peyré.

'L'homme de choc' ye'l títulu nuevu de 'Calume', que trai Javier Martínez Concheso al asturianu como 'L'home de choque'. Ye'l primer traductor en repetir nun títulu d'esta coleición dirixida por Rafael Rodríguez Valdés, que yá-y encargara la gallardonada col III Premiu Florina Alías 'Cándidu o l'optimismu' de Voltaire.

Escrita nel 1936, esta novela en francés trata sobre la Revolución d'Ochobre del 34 y naquel tiempu tornóse al inglés como 'Rehearsal in Oviedo' (New York, 1937) y 'Prelude in Oviedo' (Londres, 1938). L'asturiana, 88 años depués, va ser la tercer torna d'esti títulu gracies a la iniciativa de Trabe.

Mientres sal d'imprenta la traducción de Martínez Concheso, yá ta nes llibreríes el décimu títulu de 'Calume'. Ye 'Cacophonie' de la senegales Ken Bugul, que Mori traxo tamién del francés al asturianu como 'Cacofonía'.

Na semeya, Martínez Concheso posa con un exemplar de 'Cándidu o l'optimismu' nuna firma de llibros celebrada nel puestu d'Iniciativa pol Asturianu na Feria Internacional de Muestres d'Asturies (FIDMA).