Una mesa redonda sirve de presentación del volume 'El celtismu musical asturianu'

El so coordinador Ignaciu Llope, Lisardo Lombardía, Llorián García y Carlos Núñez, prologuista, participen nun actu nel que'l gallegu tamién va dar conocer el so discu nuevu.

'Interceltismu y celtismu musical, una vía atlántica abierta al mundu' ye'l nome de la mesa redonda programada pa esta tarde en Xixón que va servir de presentación del volume 'El celtismu musical asturianu' y del álbum 'Celtic Sea'. La Fundación Belenos ye responsable de la obra, asoleyada xunto con Goxe Producciones, que recueye les ponencies del XX Seminariu d’Estudios Asturianos, celebráu nel 2019 cola participación propiu Llope, Fonsu Fernández, Lombardía y Xune Elipe, amás de dellos artículos firmaos por músicos y espertos al respeuto d'esta temática.

“Un llibru col que conocer fondamente esti movimientu musical y el so desarrollu n'Asturies” sobre'l que va xirar esti alderique nel que, amás de Llope y Lombardía, responsables n'Allande de les intervenciones ‘El celtismu musical asturianu: un averamientu críticu’ y 'Llembrances d'un camín iniciáticu. Notes sobre los comienzos del folk y l'interceltismu nos años 80 del sieglu XX’, de manera respeutiva, van tomar la pallabra los gaiteros García y Núñez, encargáu de l'antoxana d'esti volume. El gallegu, qu'actúa esti vienres nel xixonés Teatro Xovellanos a les 20.30 hores con entraes a 18 y 25 euros, cuenta con un trabayu musical nuevu entituláu 'Celtic Sea' que va dar a conocer nesta cita.

La mesa redonda va tener llugar a les 19 hores na sala de conferencies del Centru de Cultura Antiguu Institutu. L'accesu ye llibre hasta completar aforu.