“Asturies ye’l llugar de la Península onde la xente sabe más de música celta”, rescampla Núñez

Carlos Núñez, Ignaciu Llope, Lisardo Lombardía y Llorián García ufrieron al públicu qu’enllenó la sala de conferencies del xixonés Antiguu Institutu hora y media d’interesante alderique sobre la música celta y l’interceltismu. El gaiteru gallegu, prologuista de ‘El celtismu musical asturianu’, rescampló’l nivel conocimientu qu’hai n’Asturies al referise al volume de la Fundación Belenos.

“Asturies, pa min, ye’l llugar de toa España y de tola Península onde la xente sabe más de música celta, onde más s’entiende d’ella”, espresó’l miércoles Núñez na primer parte d’un actu entamáu por él que se dedicó al entamu a presentar el llibru y el discu ‘Celtic Sea’ que’l vigués va llevar al escenariu esta tarde nel Teatru Xovellanos (20.30 hores, entraes a 18 y 25 euros), conciertu que raspia’l enllenu, con 4 asientos llibres en xeneral nel momentu d'espublizar esta crónica. Una entradina que daría pasu al alderique 'Interceltismu y celtismu musical, una vía atlántica abierta al mundu'.

El primeru foi García, que, en referencia a unes pallabres de Núñez “nes que dicía que tamos nun procesu de cambiu mui fuerte, “falaba del cambiu climáticu, yo diría que tamos tamién nun cambiu de mundu y cuasi diría de cosmoloxía”. Recordó “cuando nos años 90 esi pasu de sonar como parte d’una romería, un prau, con naturaleza de fondu, a sonar como cultura” y entrugóse si “nel sieglu XXI esi tipu de rellación ente naturaleza y cultura sigue siendo d’actualidá. Yo creo que sí, de dalguna manera, pero qué otru tipu de problemes tenemos xustamente con esi cambiu climáticu y demás”.

Siguió’l musicólogu y gaiteru señalando que “lo que me paez ye qu’esa idea de naturaleza cola que trabayamos nos 70, 80 y 90, una naturaleza sobre la que construyíamos una catedral, yera como’l roncón d’una gaita o’l gordón d’una zanfona, estables, sobre la que construyíamos en suelu firme”, cambia agora, “yá nun tamos sobre suelu firme”, dalgo que siente con trabayos como’l de Núñez. “Ye una sinfonía navegante, na que’l trabayu de composición seya de representar solamente la música, siento qu’hai un trabayu distintu nel que paez que’l mar célticu ta cantando al traviés de los so arreglos”, espresó.

“Tamos en metá d’esi cambiu qu’implica maneres distintes de pensar, inclusive la composición musical y el papel de lo sonoro. Y si enantes dicía que veníamos de la conceición del celtismu musical que se construyía sobre gordones estables, Carlos equí aporta un puntu de partida nel que construyir al traviés de los vaivenes de la mar”, finó la so primer intervención.

El cuestionamientu n’ámbitos académicos

El volume ‘El celtismu musical asturianu’ salió del XX Seminariu d’Estudios Asturianos, celebráu nel 2019, y Llope, el so coordinador y autor de la intervención ‘El celtismu musical asturianu: un averamientu críticu’, apuntó que propunxó a los sos compañeros de Belenos esta cuestión por “una razón puramente suxetiva: el términu musica celta ye un términu claramente cuestionáu n’ámbitos académicos, inclusive con dalgo de burlla y de superioridá intelectual. Ye mui frecuente, sobre too en medios españoles, muncho menos n’anglosaxones y menos tamién en franceses, calificar a la música celta como ‘la llamada música celta’, como una especie de cuestionamientu de la propia esistencia del términu. ¿Por qué? De dalguna al organizar esti seminariu pretendía dar una respuesta a esto”, que’l siquiatra considera se debe “al ésitu de la música celta”.

“Ye verdá que la música celta ye un xéneru musical de los 90 p’acá, si ye verdá que ye una etiqueta comercial tremendamente esitosa, pero al empar ye música tradicional, y al empar ye un xéneru híbridu que tuvo la virtú de sobrevivir dende sociedaes campesines a sociedaes postindustriales. Y non toles músiques tradicionales del mundu occidente son quien a dicir eso”, siguió Llope, qu’añadió que “la música celta, en concreto n’Asturies y Galicia, supunxo la metodoloxía d’un tránsitu d’una sociedá tradicional rural, de les músiques producíes en términos campesinos, a la modernidá, ye dicir, a una sociedá urbanizada y en procesu de cambiu. Ensin l’aplicación d’esa metodoloxía problablemente les músiques tradicionales y populares, que nun son sinónimes, d’estos dos países, taríen n’arba del desaniciu”.

Darréu esplicó que la definición primera de música celta, nel sieglu XVIII, ye la de “músiques tradicionales producíes por campesinos portadores de llingua céltiques”. Esti ye l’orixe a partir del que va producir “un procesu de cambiu, de mutación y tresformación del términu a lo llargo de la historia” hasta lo que güei conocemos como tal.

“Mui rápido”, yá a lo últimu del XVIII, apunta, “entamen les hibridaciones. Músicos, compositores de tradición culta, intervienen sobre la tradición popular reinventándola y hibridándola”.

El celtismu como parte de la costrucción de la identidá asturiana

Tomó la pallabra depués Lombardía, qu’en La Puela presentó, agora disponible nel llibru, ‘Llembrances d'un camín iniciáticu. Notes sobre los comienzos del folk y l'interceltismu nos años 80 del sieglu XX’, nel que relleta “como, d’una manera progresiva y cuasi ensin buscalo, voi convenciéndome de que somos un país celta y como la nuesa cultura ta nesi marcu global que ta coneutáu pol Atlánticu”. Pa ello foi clave’l descubrimientu, nel 1977, de Bretaña, nación a la que taría años depués mui xuníu, hasta’l puntu de dirixir dende An Loriant el festival celta más importante del mundu, el Festival Interceltique de Lorient.

“Yo conocía Francia por razones personales, pero cuando llego a Bretaña dime cuenta que nun yera la Francia que yo conocía, que yera otra cosa. Y lo que más me llamaba l’atención la familiaridá de lo qu’atopaba”, nun momentu nel que “nun tenía nenguna conciencia sobre’l celtismu”. “Por simplificar, y anque sía anecdóticu, la xente usaba madreñes, bebe sidra, come frixuelos, toca la gaita, baillen danzes primes”, rellató Lombardía sobre lo que-y llevó “a afondar na cuestión”.

“El celtismu forma parte de la construcción de la identidá asturiana y problablemente ensin esta dimensión atlántica, esta dimensión céltica, Asturies nun tien futuru”, afirmó’l médicu depués d’analizar la so esperiencia col mundu intercélticu.

Por último, Núñez insistió en que “tamos nun momentu mui interesante porque nos tamos volviendo a reconeutar los países atlánticos y d’equí van salir coses” y animó a que dende la universidá “aborden el tema celta ensin mieu”.

L'interceltismu

Nel intercambiu de pareceres, Llope apuntó, ente otres cuestiones que, “cuando los debates d’arqueoloxía o d’historia son tan encesos débese a que nun se debate sobre’l pasáu, discútese sobre’l presente. La discusión tan encesa n’Asturies y Galicia alredor del celtismu históricu tien que ver con eso”.

García, pela so parte, quixo reflexonar “sobre’l momentu nel que tamos”. “Los últimos diez o quince años, coincidiendo col mundu que s’abre paralelu a la crisis financiera del 2008, foron años de crisis del celtismu porque hebo crisis tamién d’un determinada concepción de la emancipación, d’una concepción del futuru que se ve frustrada, y eso tamién altera la concepción que tenemos del pasáu”, polo que ve a estos diez años últimos como “los años de la vuelta a les músiques tradicionales, de la vuelta a elementos que’l celtismu nos sos plantegamientos hexemónicos nun taba teniendo consideración. Yo creo qu’hebo esi momentu reflexivu que nel 2023 podemos dar por acabáu”.

Nesi sen, señaló que “sería interesante prestar a atención a qué tipu de rellaciones podíen ayudanos a esi resurdir del celtismu”, que considera “un pegamentu tremendu que permite articular cualquier cosa”, como les artes plástiques, amás de la música. Darréu citó como una de les xeres pa ello “articular una diplomacia” que sirva de trabayu de reparación.

Lombardía emponderó la importancia del interceltismu, que “ye creador, dinamizador y una potencia enorme. Una construcción que se fixo básicamente dende Bretaña, anque non sólo, y qu’amuesa una visión mui abierta del mundu”. Nesi sen rescampló “esa capacidá de respetu, admiración y sobre too de reapropiación de l’alteridá, de los otros” que vivió en Breizh.

Pa zarrar, Núñez dio pasu a un llargu alderique de cuasi 45 minutos col públicu nel que se llanzaron entrugues y reflexones qu’ayudar a afondar en cuestiones concretes del tema a tratar, el celtismu musical asturianu.

Na semeya, García, Llope, Lombardía y Núñez.