Un Xosefa Xovellanos de “nivel escelente” merezlu Sidoro Villa por 'El fervinchu'

Doce obres de “nivel escelente” compitieron nesta edición del Premiu Xosefa Xovellanos de novela, la cuarentena primera. El ganador foi Sidoro Villa, escritor y ilustrador que sorprendiera a los llectores estos últimos años coles noveles ‘A estaya’ y ‘Tres beyuscos’, gracies al so trabayu ‘El fervinchu’.

“Xira alredor de los llazos familiares y la so perduración nel tiempu, antes y depués de la muerte, nun contestu rural que termina’l so ciclu”, esplica’l xuráu, qu’añade que la obra, que se pue considerar una novela coral, ta estructurada alredor de la güela, un papel protagonista concebíu como personaxe femenín d'una gran fortaleza y complexidá. Tamién rescampla “la construcción del restu de personaxes, la so fondura psicolóxica y l'humor negru que percuerre tola obra”.

Antón García, direutor xeneral de Política Llingüística, presidió’l mesmu, con Lourdes Álvarez, filóloga de la direición xeneral, como secretaria. Conformáronlu la promotora cultural Natalia González, el profesor Marcos Martínez, les escritores Marta Mori y Paula Pulgar, y el ganador de la edición anterior del Xosefa Xovellanos con ‘Los xardinos de la lluna’, Francisco ‘Paco’ Álvarez González.

Nacíu en Lieres nel añu 1962, Villa vieno espublizando llibros infantiles y xuveniles como ‘¡Nun-yos tengas perceguera!’ (2004), ‘Llibru de los suaños’ (2007), ‘Mael al debalu’ (2010), ‘Evaristo Valle, el pintor del antroxu’ (2011) y ‘Nun-yos tengas perceguera 2’ (2016). Foi precisamente nesti últimu añu cuando asoleyó la so primer novela p’adultos, la emponderada ‘A estaya’, a la que siguió nel 2019 ‘Tres beyuscos’.

Restu de premiaos

El Xosefa Xovellanos ye’l postreru gallardón de los cinco Premios Lliterarios en fallase. El restu de ganadores son Alberto Vázquez García (XII Premiu Alfonso Iglesias de cómic con ‘El sol na escombrera’), Alejandro Fernández-Osorio’l (XXVI Xuan María Acebal de poesía con ‘Tayu’), Xune Elipe (XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’) y Vero Suari y Inaciu Galán (XIII Premiu María Xosefa Canellada de lliteratura infantil y xuvenil con ‘La curuxa Catuxa’).