Paco Álvarez lleva nuna selmana’l Xosefa Xovellanos y el Xosé Caveda y Nava

El xixonés Francisco ‘Paco’ Álvarez sigue sumando gallardones lliterarios nesti 2019. Esti miércoles conocíase que llevaba’l so segundu Premiu Xosefa Xovellanos de novela, díes depués de ganar el III Concursu de Relatos Curtios Xosé Caveda y Nava, que se sumen al de cuentos de Bimenes y el de narraciones de Candamu.

L’últimu en conocese foi’l del premiu más veteranu y destacáu de la lliteratura asturiana, el Xosefa Xovellanos de novela, qu’algama la so cuarentena edición. El xuráu aconceyáu na tarde d’ayeri baxo la presidencia del direutor xeneral de Política Llingüística Antón García, formáu por polos escritores y especialistes Pilar Arnaldo, Paz Fonticiella, Paula Pulgar, José Luis Rendueles y Manuel García Menéndez –ganador de la edición pasada con ‘El visitante impropiu’–, decidió conceder el gallardón a la obra entitulada ‘Los xardinos de la lluna’ por tratase de “una obra narrativamente sólida, con diálogos mui bien construyíos y descripciones preciosistes, que ye quién a axuntar el tonu llíricu colo social”.

Abierta la plica’l ganador resultó ser Álvarez, que nel 2015 yá llevara esti premiu gracies al esitosu ‘Lluvia d’agostu’, llibru tornáu llueu al castellanu y que nos meses vinientes el sellu vienés Bahoe Books va editar n’alemán. El nomatu emplegáu pol periodista y escritor, que lleva una recompensa de 5.000 euros tres l’aumentu nos Premios Lliterarios de 2.000 euros en toles estayes esta convocatoria, foi ‘Yuri Sarka’.

Tamién gana en Villaviciosa

Esti gallardón llega poco díes depués de que’l xixonés fora gallardonáu col III Premiu de Relatos Curtios Xosé Caveda y Nava, entamáu pol Conceyu de Villaviciosa con una dotación económica de 1000 euros. Álvarez presentó ‘El faru de Viena’, obra que’l xuráu, formáu pola escritora y secretaria de l’Academia de la Llingua Asturiana, Marta Mori; la crítica lliteraria Marta López Fernández; y el profesor y presidente de l’asociación Cubera, Ángel Valle, actuando como secretariu Pablo X. Suárez, responsable del Serviciu de Normalización Llingüística ‘Comarca de la Sidra’, escoyó por unanimidá como merecedor del concursu pol "valir d’una historia bien narrada, aposentada en fechos históricos de relevancia y col interés necesariu como pa mantener una llectura atenta y emocionada".

El Xosefa Xovellanos y Xosé Caveda y Nava nun son los únicos premios lliterarios que suma’l tamién traductor esti añu. En marzu llevara’l IV Concursu de Rellatu Curtiu Conceyu de Candamu con ‘L’home de la lluz y la tiniebla’ y n’ochobre’l XXII Concursu de Cuentos pola Oficialidá del Asturianu, qu’entrega’l Conceyu de Bimenes, por ‘Rosa d’iviernu’.

Premios Lliterarios 2019

Con esti fallu, yá se conocen tolos ganadores de los Premios Lliterarios qu’entama la Conseyería de Cultura, Política Llingüística y Turismu. Ruma Barbero llevó’l XI Alfonso Iglesias de cómic por 'Seltegu', José Ángel Gayol el XXV Premiu Máximo Fuertes Acevedo d’ensayu por ‘El silenciu invisible’ y Gonzalo G. Barreñada el XXV Premiu Xuan María Acebal de poesía por ‘El llar n’orde’, mentes que, per primer vegada nes sos doce ediciones, el Premiu María Xosefa Canellada de lliteratura infantil y xuvenil quedó ermu.