Un total de 32 partíos y coaliciones preséntense pa les Europees

|
Parllamentu Européu por Alfredovic

La Xunta Eleutoral validó 32 de les 39 candidatures presentaes pa les eleiciones al Parllamentu Européu del día 26, que coinciden coles Nacionales y municipales. Foro, qu’acude como Foro de Ciudadanos (FAC), y Andecha Astur, na coalición Agora Repúbliques, son les úniques formaciones asturianes que participen.

L’Estáu español tien derechu a 54 eurodiputaos pa un mandatu de 5 años. Nel casu de confirmase la salidá del Reinu Xuníu de la Xunión Europea nos meses próximos, habría que sumar otros 5 más hasta 59, que seríen asignaos pola Xunta Eleutoral Central ensin necesidá d’entamar eleiciones nueves.

Al ser de circunscripción única, estes eleiciones favorecen los pautos eleutorales y coaliciones ente formaciones nacionalistes y rexonalistes cola fin d’algamar representación. D’esta forma, una revisión a les candidatures presentaes y confirmaes da pie a la presencia de munches novedaes con respeuto a hai 5 años.

Los dos partíos estatales mayoritarios acuden a la cita con Dolors Montserrat (PP) y Josep Borrell (PSOE), que tratarán de defender los 16 y 14 escaños algamaos, de manera respeutiva, nel 2014. Izquierda Unida, que sumó 6, y Podemos, 5, preséntese xuntos baxo la marca Unidas Podemos Cambiar Europa, cola independiente María Eugenia Rodríguez Palop como cabezalera.

UPyD, con 4 eurodiputaos anguaño, nun se va presentar, incorporándose Cristiano Brown, líder d’esti partíu, a la llista de Ciudadanos-Partido de la Ciudadanía como independiente nel númberu 11. Luis Garicano va ser el candidatu d’esta formación con 2 escaños nel Parllamentu Européu.

Les coaliciones

Coalición por Europa (CDC, UDC, EAJ-PNV, CC-PNC y CxG), con 3, pasa a nomase Coalición por una Europa Solidaria y suma a El Pi-Proposta per les Illes Balears, Geroa Bai y Demòcrates Valencians. Mentes, pierde a los sos socios catalanes, que van como Lliures per Europa, con Carles Puigdemont como númberu 1 tres ganar el recursu contra la decisión de la Xunta Eleutoral de dexalu fuera por consideralu un fugáu de la xusticia española.

La Esquerra pel Dret a Decidir, liderada por Esquerra Republicana de Catalunya (ERC), con 2, amiéstase con Los Pueblos Deciden, con 1, pa formar Agora Repúbliques. La coalición nueva ta participada por Andecha Astur, EH Bildu, Bloque Nacionalista Galego (BNG), Puyalón de Cuchas, Ahora Canarias y Esquerra Republicana de Catalunya (ERC).

Oriol Junqueras, na cárcel de manera preventiva pol 'procés', lidera la llista, y finalmente col vascu Pernando Barrena como númberu 2 en detrimentu del actual europarllamentariu Josu Juaristi, mentes que los catalanes Diana Riba y Jordi Solé van de 3 y 4, y la gallega Ana María Miranda baxa al 5. Los candidatos d’Andecha son Llucía Fernández Marqués (puestu 25) y Mario Arbesú (38).

Primavera Europea (Compromís, EQUO, CHA, Participa, PUM+J, PCAS-TC, SIEX y Caballas), con 1, nun repite. La formación valenciana va acudir como Compromís per Europa/Compromiso por Europa xunto a En Marea, Nueva Canarias, Més per Mallorca, CHA, PCAS-TC, Caballas, Coalición por Melilla, Iniciativa del Pueblo Andaluz, Izquierda Andalucista y Verdes de Europa, y presenta a Jordi Sebastià como candidatu.

La otra formación asturiana, amás d’Andecha, que participa nes Europees ye Foro, que decide dir en solitariu. Justo Marco Grana ye la persona qu’encabeza la llista forista nestes eleiciones.

El restu de candidatures presentaes son Iniciativa Feminista, con Consuelo Mira como númberu 1; Alternativa Republicana, con Pedro Alberto García Bilbao; Centristas por Europa, con Francisco Jesús Martín; Contigo Somos Democracia, con Domingo Rojo; FE de las JONS, Alternativa Española, La Falange y Democracia Nacional, con Martín Ricardo Sáenz de Ynestrillas; PACMA, con Silvia Barquero; Solidaridad y Gestión Internacionalista, con Diego Velicia; PCTE, con Ástor García; Partido Humanista, con Eva María Ubago; Andalucía por Sí, con Juan Ramón Flores; Actúa, con María Garzón; Movimiento Independiente Euro Latino, con José Luis Cordeiro; Izquierda en Positivo, con Javier Couso; PCPE-PCPC-PCPA, con Carmelo Antonio Suárez; PUM+J, con Alejandro Plans; Movimiento Corriente Roja, con Laura Requena; VOX, con Jorge Buxadé; Igualdad Real, con Antonia Alba; Pirates de Catalunya-European Pirates, con Carlos González Iglesias; Volt Europa, con Bruno Sánchez-Andrade; Coalición Verde-Europa Ciudadana, con Alejandro León; Recortes Cero-Los Verdes-Grupo Verde Europeo, con Sara Montero; y Extremeños, con Juan Carlos Herrero.

Eurodiputaos asturianos

Asturies anguaño cuenta con cuatro eurodiputaos: Jonás Fernández Álvarez (PSOE), Ángela Vallina (IU-LV) y Tania González Peñas y Estefanía Torres (Podemos). D’ellos, namái repite’l socialista, que va nel puestu 16, mentes que Vallina va ser la candidata a la Xunta Xeneral d’IX-IAS y González Peñas a l’alcaldía por Cambia Avilés.

Pela so parte, Torres decidió nun presentase a nengún tipu de primaries.

Semeya obra d'Alfredovic baxo llicencia CC BY-SA 3.0.

AdxuntuTamañu
PDF icon Candidatures proclamaes Europees 20191000.4 KB
Contador Estadistiques