El PSOE tamién ye'l partíu más votáu nes eleiciones europees

Jonás Fernández Álvarez va repetir como eurodiputáu. Los socialistes sumen 20 escaños, por 12 del PP, que ganara nel 2014.

La candidatura del PSOE liderada por Josep Borrell foi la más votada nel Estáu nes eleiciones europees. Col 99,94 por cientu escrutáu, algamó un total del 32,84 por cientu (el PSOE rexistró 23 por cientu nel 2014), pol 20,13 por cientu de la llista de Dolors Montserrat (26,08 por cientu).

D'esta forma, los socialistes sumen seis europarllamentarios más qu'hai 5 años, mentes que qu'l PP baxa 4. La tercer fuercia pasa a ser Ciudadanos, qu'aumenta de 2 (3,17 por cientu) a 7 representantes (12,17 por cientu), quedando perriba d'IU y Podemos, que contaben con 6 (10 por cientu) y 5 escaños (7,97 por cientu), de manera respeutiva, y que diendo xuntos como Unidas Podemos Cambiar Europa quedaron con 6 (10,05 por cientu), esto ye, 5 menos.

VOX entra nel Parllamentu Européu con 3 al aumentar d'un 1,57 por cientu a un 6,20 por cientu.

Agora Repúbliques caltién los sos trés representantes

Trés de les coaliciones de formaciones nacionalistes o rexonalistes que se xunen pa poder tener opciones de representación, al ser les Europees de circunscripción única, van tar nel Parllamentu. La más votada foi Agora Repúbliques, coalición formada por Andecha Astur, EH Bildu, Bloque Nacionalista Galego (BNG), Puyalón de Cuchas, Ahora Canarias y Esquerra Republicana de Catalunya (ERC), que con un 5,61 por cientu consiguió caltener los 3 escaños colos que contaba: 2 por L'Esquerra pel Dret a Decidir y 1 por Los Pueblos Deciden.

D'esta forma, los representantes d'Agora Repúbliques van ser los catalanes Oriol Junqueras –en prisión preventiva pol 'procés– y Diana Riba, y el vascu Pernando Barrena. N'Asturies, con resultaos yá definitivos, Agora Repúbliques sumó 1,886 votos, con un 0,36 por cientu del total.

Tamién ganó'l so acta nel Parllamentu Européu Carles Puigdemont, qu'encabezaba la candidatura de Junts, formación que lleva 2 escaños (4,58). L'EAJ-PNV, líder de la Coalición por Europa, caltién el suyu, mentes que Compromís per Europa/Compromiso por Europa pierde'l so representante al rexistrar un 1,32 por cientu del total (1,92 por cientu nel 2014).

Foro qu'acudía en solitariu como Foro de Ciudadanos, namái algamó un 0,06 por cientu en tol Estáu, con más de 14.000 votos. D'ellos sumó 6.053 n'Asturies (1,16 por cientu).

Dos eurodiputaos asturianos

Asturies contará con dos eurodiputaos asturianos nesta llexislatura, dos menos que na anterior. Repite'l socialista Fernández Álvarez, mentes que debuta como parllamentaria n'Europa Susana Solís –nacida n'Avilés pero residente en Madrid, onde yera diputada de l'Asamblea de la Comunidad de Madrid–, qu'ocupaba'l númberu 7 de la llista de Ciudadanos.