Un informe recueye torgues al alumnáu pa matriculase esti cursu na materia de Llingua Asturiana

Iniciativa pol Asturianu ellaboró un informe, que treslladó a los equipos de trabayu de les conseyeríes d’Educación y de Cultura, Política Llingüística y Turismu, nel qu’inclúi les conclusiones del alcuentru entamáu’l 18 de setiembre con docentes. Nel testu rellátense torgues al alumnáu pa matriculase esti cursu en Llingua Asturiana y en Gallego-asturiano, ente otros problemes.

Presiones, información falsiada o direutamente la negación de la posibilidá de recibir clase d’asturianu porque “nun s’ofertaba” son dalgunes de les situaciones inaceptables qu’alumnes y alumnos y families viven a la hora de formalizar la inscripción pa l’asignatura. Esperiencies qu’Iniciativa pol Asturiana recoyó y qu’esplica nesti informe col que pretendete denunciar estos fechos y “iguar d’una manera definitiva tantes dificultades pa los y les docentes, asina como pal desarrollu normal del so trabayu y aprendizaxe de la llingua asturiana”.

La desapaición de xornaes completes en Primaria o’l refugu de les ampliaciones magar les necesidaes de los centros, son dalgunes de les quexes treslladaes a la organización polos docentes, que pretende ser interlocutor cola Almnistración no que respeuta al enseñu del asturianu y del gallego-asturiano. Asina, tresllada 7 recomendaciones p’ameyorar la situación.

La primera ye “tener una comunicación constante en tolos cursos académicos colos centros educativos (concertaos y públicos) pa recordar a los docentes, a los equipos direutivos y a los y les trabayadores de los centros la obligatoriedá d’ufiertar y facilitar l’accesu llibre a l’asignatura d’asturianu”. L’informe tamién insiste na necesidá de que nun se pongan torgues a la elleición de les families, un impulsu de les campañes, soluciones pa la situación de la materia en Bachilleratu, xornaes completes en Secundaria, ampliación de les places del Máster de Profesoráu d’Asturianu y la creación de la especialidá docente.