Mes y mediu de clases ensin maestru d'asturianu o dando otra materia por mandáu del centru

Ésa ye la realidá de non poques escolines y escolinos d'asturianu. Iniciativa pol Asturianu treslladó a la Conseyería d’Educación numberoses quexes por nun contar entovía con maestru d’asturianu y rescampla’l casu d’un alumnu del IES Aramo al que’l centru obliga a cursar una materia a la que nun se matriculó.

El 22 de setiembre echó a andar el cursu en Primaria, el 28 en Secundaria y el 29 en Bachilleratu. Mes y mediu depués dase’l casu n’Asturies d’escolines y escolinos apuntaos a Llingua Asturiana y Lliteratura qu’entovía nun recibieron nin una hora de clase: “Siguen ensin profesor a estes altures del cursu”, alerta Iniciativa pol Asturianu.

La organización recibió delles quexes de diferentes centros del país con esta problemática qu’ocurre tanto n’escueles públiques como concertaes. Unes montonera de reclamaciones que yá treslladó a la Conseyería d’Educación y a la Direición Xeneral de Política Llingüística, munches yá recoyíes nel informe nel que se señalaben situaciones esmolecientes dientro de l’asignatura de Llingua Asturiana.

Ente elles rescampla una situación qu’Iniciativa pol Asturianu quier facer pública dada la so gravedá. Trátase d’un mozu apuntáu a Llingua Asturiana nel uvieín IES Aramo al que se-y “modificó la matrícula ensin permisu del alumnu”, polo que “ta cursando una asignatura que a la que nun s’apuntó”.

L’alternativa, dir a otru centru pa dar asturianu

“Esto ocurrió ensin avisu previu a la familia nin al estudiante. Al pidir cuentes a los responsables del institutu, éstos animen al alumnu, menor d'edá, a dir a otru centru educativu (a cursar l'asignatura), cuando nel centru hai profesor de Llingua Asturiana y Lliteratura y namás sedría necesario amplia-y la xornada”, llamenta’l coleutivu, que considera ésta como una “situación de marxinación y maltratu al alumnu, contrariu a la llexislación vixente”.

Asina, esixe a la direición del centru “que ponga solución inmediata, yá que l’estudiante ta nesti momentu treslladáu a otra asignatura que nun escoyó. Pa ello, amparámonos na Llei 1/98 de 23 de Marzu, d'Usu y Promoción del Asturianu (BOPA Númb.73, del 28-II-98) y na sentencia ratificatoria del Tribunal Supremu d’abril de 2012”. Tamién a la conseyería “una investigación interna pa saber quién foi la persona que modificó, ensin nengún tipu de permisu atentando contra la voluntá del estudiante y la so familia, el documentu oficial de la matrícula”.