Un gol del Jony da esperanza al Sporting nuna nueche pa escaecer

|
Valladolid 3-1 Sporting (7 de xunu del 2018) reducida

Los roxiblancos salieron ensin la tensión que requier un partíu d'estes carauterístiques y encaxaron trés goles ente los minutos 28 y 37.

El Sporting tuvo a un tris d'echar por tierra la temporada en 45 minutos de velea en Zorrilla. Los de Baraja enfrentábense na ida de la primer eliminatoria pol ascensu a Primera División al Valladolid, equipu qu'atopó munches facilidaes que-y permiteron llegar al descansu con un 3-0.

Calero abrió'l marcador nel 28 al adelantase a un pasivu Calavera nun centru dende la derecha d'Hervías. El gol xubió al marcador pese a una falta nidia de Kiko Olivas a Juan Rodríguez que nun quixo ver el colexáu Isidro Díaz de Mera.

Namái una vegada llegara enantes el Sporting a inquietar a Masip pese a la importancia que supón nesti tipu d'elminatories marcar fuera de casa. El gol supunxo amás un refuerciu pa un Valladolid mui cómodu nel campu que vería como un Hervías en gracia volvía a anotar un llibre direutu depués del que marcó nel decisivu partíu con Osasuna del sábadu.

El tantu del ex oviedista llegaba nel 34 y trés minutos depués Calavera introducía'l balón na so propia portería nuna xugada na que Mata buscaba xirase pa rematar. Trés goles en 9 minutos que facíen ferver Zorrilla.

Cambiu tres el descansu

Los 591 aficionaos asturianos desplazaos a Valladolid demandaben a los sos xugadores más puxu y ésti nun llegaría hasta pasar pel vestuariu. El Sporting de la segunda parte ufrió otra cara, anque tamién foi mui probe pa un equipu que buscar xugar na máxima categoría del fútbo estatal.

Namái Jony, qu'aprovechó un error de Moyano nel 69 pa plantase énte Masip, consiguió dar dalgo d'esperanza a un afición que va a tornar a enllenar El Molinón el domingu a les 20.30 hores. La bona racha de los de Baraja nel so feudu, con una única derrota nos doce alcuentros únicos como llocal, ye motivu pa confiar na remontada.

Contador Estadistiques